ހެޔޮވެރިކަމެއްގައި ހުރިހާ ރައްޔިތުންވެސް ހަމަ ހަމަ ވާނެއެވެ. ވަކި ރައްޔިތަކަށް ވަކި ގޮތެއް ނޯންނާނެއެވެ. އަދި ތަފާތުކުރުން ވެސް ނޯންނާނެއެވެ.

އެގޮތުން އެފަދަ ވެރިކަމެއް ގައުމުގެ ތާރީޚުގައި މިހާތަނަށް ކޮށްދެއްވީ ރައީސް އަބްދުﷲ ޔާމީންއެވެ. ކުޑަ ރަށެއް ބޮޑު ރަށެއް ތަފާތުކުރުމެއް ނެތި ތަރައްގީ ކޮންމެ ރައްޔިތަކަށްވެސް ގެނެސްދެއްވިއެވެ. އެއީ އެމަނިކުފާނުގެ ހިކުމަތު އަމަލީއާ ވެސް އެކުއެވެ.

އެހެންކަމުން އެމަނިކުފާނު ފިޔަވަޅުފުޅުގެ މަތިން އެމަނިކުފާނު ފޮޓޯއާ އަދި ހުސްގޮނޑި ވެސް ދައްކައިގެން އައި ސަރުކާރެއްގެ ފަރާތުން އެކަންކަން ރައްޔިތުން އުއްމީދުކުރާނެ ކަން ޔަގީނެވެ.

ނިމިދިޔަ ފަސް އަހަރަކީ ރައްޔިތުންނަށް ހެވެއް ލާބައެއް މަންފާ އެއް ނުކުރި ފަސް އަހަރު ކަަމަށްވުމުން ރައްޔިތުންނާ ރަށް ރަށާ ވެސް އޮތީ އިހުނަށް ވުރެ ބޮޑަށް އަޅާލުމާ މަޝްރޫއުތަކަށް ބޭނުން ޖެހިފައެވެ. އެމްޑީޕީ ސަރުކާރުން ވެސް ތަރައްގީގެ މަޝްރޫއުތައް ކުރިއަށް ގެންދަން ފެށި ރަށްރަށް ވެސް ހުރި ނަމަވެސް އެކަންކަންވެސް އެދެވޭ ގޮތަކަށް ފަސް އަހަރު ތެރޭގައި ކުރިއަށް ނުގެންދެވުމުން ހުރީ މަޑު ޖެހިފައެވެ.

މި ހުރިހާ ކަމެއް މިހެން ހުރުމާއެކު ނިކަން ފޮނި އުއްމީދުގައި، ރައީސް ޔާމީންގެ އާރުކާޓީކަމުގެ ދަށުން ހިނގާނެ ކަމަށް ރައްޔިތުން އުއްމީދު ކުރި ސަރުކާރެއް ގެނައެވެ. 2013 އިން 2018އަށް ދިވެހީން ދުށް ފަދަ ތަރައްގީއާ ތަހުޒީބުގެ ކުލަ ރީތި މަޝްރޫއުތައް އަސްލަށް ހެދުމަށެވެ.

ނަމަވެސް 2023 ވަނަ އަހަރުގެ ނިވެމްބަރު މަހުގެ 17 ވަނަ ދުވަހު ހުވާކުރެއްވި ދިވެހީންގެ ރައީސްގެ ކިބައިން މާ އޮއްޓަރު ހުރި ކަންކަން ނުފެންނަ ކަމަށް ވެރިކަމުގެ ވަރަށް ކުރީ ކޮޅު ރައްޔިތުން ބުނަން ފަށައިފިއެވެ. ނިކަމެތި ރައްޔިތުން ބާކީކޮށް މާ ދުރު ކުޅި ބަލަން ތިބި ބަޔަކު ގެނެސް ތޮއްވަރިއަށް ވައްދާ ގައުމުގެ ޚަރަދުތައް އިންތިހާއަށް ބޮޑު ކުރީ ބޮޑެތި މުސާރަތައް އެބައިމީހުންނަށް ދީގެން ކަމަށް ފެންނަން އެބަހުއްޓެވެ.

ސަރުކާރަށް ވާގިވެރިވާ މީހުން އޭރު ބުނީ ސަރުކާރަށް ފާޑުކިޔަން މާ އަވަސްކަމަށެވެ. ނަމަވެސް ރައްޔިތުން ތިބީ ނުހަނު ފާރަވެރިވެ ކަންކަން ބަަލަން ކަމުގައި ވަވުމުން އެ ރައްޔިތުންނަށް ގައުމަށް އޯވަރ ނައިޓަކުން ވެސް ބަދަލެއް އައިސިއްޔާ އެނގޭނެތާއެވެ.

އެގޮތުން ރައްޔިތުން ބުނަމުން ދިޔައީ އެންމެ ފުރަތަމަ ދުވަހުވެސް، ވެރިކަމުގެ ކުރިން ވީ ވައުދާ ކަންކަން ތަފާތުކަން ފާހަގަކުރެވުނު ކަމަށެވެ.

ދައުލަތުގެ ޚަރަދު ބޮޑުވެ ގައުމު ބަނގުރޫޓުވުމާ ދިމާއަށް މިސްރާބު ޖަހާފައިވާތީ އެކަމުގެ އެލާރޓު ދުނިޔޭގެ މާލީ އިދާރާތަކުން އަޅަން ފެށުމުންވެސް އެ މީހުންގެ ހުށަހެޅުމުގައި ވެސް ކޮޅުފައިން ޖެހީއެވެ. ތިމަންމެން މީ ދުނިޔެ ނުދެކޭ ވަރުގެ އިކޮނޮމިސްޓުންކަމަށް ދެކެނީ ތޯއްޗެކެވެ.

ކޮންމެ އަކަސް ޚަރަދު ވެސް އެންމެ ތަންފުކެއް ވެސް ކުޑަ ނުވެއެވެ. ސިޔާސީ މީހުން މަދު ކުރަނީ ކަމަށް ބުނި ނަމަވެސް އެއީ ވެސް ލޮލުގައި އަލުވާލި އަނދުނެއް ކަމަށް ގިނަ ބަޔަކު ބުނެއެވެ.

މިހާ ހިސާބަށް ގައުމުގެ ކަންކަން ގޮސްފައިވާއިރު ދައުލަތުގެ ބަޖެޓު ހުސްވިކަން ހާމަވިއެވެ. އަސްތާ މިވީ ކިހިނެއް ހެއްޔެވެ. އަދި ބަޖެޓު ފާސްކުރި މުއްދަތު ވެސް ފަހަނާ ނުދަނީސް ބަޖެޓު ހުސްވެ ސަޕްލިމެންޓްރީ ބަޖެޓެއް ހުށަހަޅަން ސަރުކާރުން ތައްޔާރު ވަނީއެވެ. ޚަރަދުތައް ދެކޮޅު ނުޖެއްސިގެން އަހަރުގެ ބާކީއަށް އަނެއްކާވެސް ފައިސާ ހޯދަން ޖެހުނީއެވެ.

ނަމަވެސް މީގައި އެންމެ ހެއްވާ ތަންކޮޅަކީ 50 މިލިއަންގެ ބޮޑު ބިޔަ ބަޖެޓެއް ޚަލާސްވިއިރު އެއިން ރައްޔިތުންނަށް ކުރި ރާހަތެއް ނެތުމެވެ. ރަށް ރަށުގެ ތަރައްގީ ހުއްޓިފައެވެ. މަޝްރޫއުތައް މަޑު ޖެހި ވަޅޯވެފައެވެ. މުޅި ގައުމު ސްލޯވެ ހަފުސްވެފައެވެ.

ކުރީ ސަރުކާރުގެ ވާހަކަ އެހެންކަމުން މި ސަރުކާރަކަށް ވެސް ވާ ދެއްކޭކަށް ނެތްތާއެވެ. އޭރުން ގޮވޭނީ ގުނދޯ ގުނދޯ ވިއްޔާއެވެ.