ސަހްޔޫނީންގެ ޕާސްޕޯޓް ވަގުތުން ތަންފީޒުކުރުމުގެ ބާރު ރައީސުލްޖުމްހޫރިއްޔާ ޑރ މުހައްމަދު މުއިއްޒުއަށް ލިބިމެ، މި ބިލް ފާސްނުކޮށް މަޖިލީހުގެ ޚާރިޖީ ގުޅުންތަކުގެ ކޮމިޓީގައި ބާއްވާފައި އޮންނަތާ 131 ދުވަސް ވެއްޖެއެވެ.

މިދިޔަ އަހަރުގެ އޮކްޓޯބަރު މަހުގެ 07 ވަނަ ދުވަހު ފެށިގެން ދިޔަ ގަތުލުއާންމު އަށް އަހަރެއް ވެގެން ދިޔަ އިރުވެސް ސަހްޔޫނީންގެ ޕާސްޕޯޓް މަނާކުރުމުގެ ފިޔަވަޅު އެޅުމަށް ސަރުކާރުން ވަނީ ނުކުޅެދިފައެވެ.

ބައިނަލްއަގްވާމީ އެކި ޕްލެޓްފޯމްތަކުގައި ފަލަސްތީނާއި ދެކޮޅަށް ސަހްޔޫނީން ކުރަމުންދާ ހަނގުރާމަ ކުއްވެރިކުރުން ފިޔަވާ އިތުރު ފިޔަވަޅެއް އަޅާ މަންޒަރެއް މިހާތަނަށް ފެނިފައިނުވެއެވެ.

މީގެ އިތުރުން، ފަލަސްތީނުގެ މިނިވަންކަމަށް ޖިހާދުކުރަމުންދާ ހަމާސް ޖަމާއަތުގެ ލީޑަރުން ޝަހީދުކޮށް، ލުބްނާން އަދި އިރާން އަށް ހުއްޓުމެއްނެތި ހަމަލާތައް އަމާޒުކުރަމުންދާއިރު ދިވެހި ސަރުކާރުން ހަނު ހުރުމަކީ ދިވެހި ރައްޔިތުން އެއްވެސް ވަރަކަށް ބަލައިގަންނާނެ ކަމެއް ނޫނެވެ.

އިސްލާމީ ޝަރީއަތެއް ގާއިމުކުރުމަށް ހުވާ ކުރައްވާ، ދީނުގެ ހައްގުގައި ވަކާލާތުކުރައްވާ އެތައް ބޭފުޅުންނެއް ސަރުކާރުގެ އިސް ސަފުގައި ތިއްބެވިއިރު އިސްލާމީ އުއްމަތެއް ސުންނާފަތިކުރަމުންދާއިރު އެފަދަ ގައުމެއްގެ ޕާސްޕޯޓް މަނާކުރަން ނުކެރި އެކަމަށް ބަސްނުބުނުމަކީ ސަރުކާރުގެ ނުކުޅެދުންތެރިކަން ހާމަވާ ކަމެއްކަމުގައި ގިނަ ބަޔަކު އަންނަނީ ބުނަމުންނެވެ. އަދި ސަރުކާރުގެ މެޖޯރިޓީ މަޖިލީހުގައި އޮވެ އެކަން ލަސްކުރަމުން ގެންދާއިރު ސަރުކާރުގެ ނިޔަތް އެކަމުގައި ރަގަޅު ނޫންކަން ހާމަވާ ކަމަށް ވެސް ގިނަ ބަޔަކު ބުނަމުންދެއެވެ.