ވޭޕް މަނާ ކުރަން ނިންމުމާ ގުޅިގެން އެކަމާ ދެކޮޅަށް ރައްޔިތުންގެ މަޖިލިސް ކައިރީ ޒުވާނުން އިހުތިޖާޖު ކޮށްފިއެވެ.

އެ ޒުވާނުން ގޮވާލާފައި ވަނީ ކުދި ވިޔަފާރިތަކަށް ވޭޕް މަނާ ކުރުމުން ބޮޑެތި ގެއްލުންތައް ވާނެ ކަމަށާއި ވޭޕް ބޭނުންކުރުމަކީ ޖިނާއީ ކުށަކަށް ހެދުމުގެ ބަދަލުގައި އެކަން ރެގިއުލޭޓް ކުރުމަށެވެ.

އަދި އޭގެއިތުރުން މަޖިލިސް ކައިރިއަށް ވޭޕް ކޮމިއުނިޓީގެ މީހުން އެއްވެެފައި ވަނީ ވޭޕް މަނާކުރުމާ ދެކޮޅަށް އިހުތިޖާޖު ކުރުމުގެ ގޮތުން މާލޭގައި ވޭޕް ވިއްކާ ފިހާރަތައް ބަންދު ކޮށްފައިވާ ދަނޑިވަޅެއްގަ އެވެ.

ރާއްޖެއަށް ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ނޮވެމްބަރު 15، އިން ފެށިގެން އެތެރެ ކުރުން މަނާކޮށް، ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިސްތިހާރު ކުރުމާއި ހިލޭބެހުން ޑިސެމްބަރު 15، އިން ފެށިގެން މަނާ ކުރުމަށް ރައީސް ޑރ. މުހައްމަދު މުއިއްޒު ނިންމެވުމާ ގުޅިގެން ގިނަ ޒުވާނުންތަކެއް އަންނަނީ ނުރުހުންފާޅުކުރަމުންނެވެ.

އެގޮތުން ސިނގިރޭޓު މަނާނުކޮށް ވޭޕް މަނާކުރުމުން ސިނގިރޭޓު ނުބޯން، ވޭޕް ކުރާ ފަރާތްތަކުން އަނެއްކާވެސް ސިނގިރޭޓު ބޯން މަޖުބޫރުވެގެންދާނެކަމަށް ވެސް ޱޒުވާނުން އަންނަނީ ގޮވާލަމުންނެވެ.