ދިވެހިރާއްޖެއިން ފަލަސްތީނުގެ ރައްޔިތުންނަށް އެހީވުމަށް ދައުލަތުގެ މީޑިއާ، ޕީއެސްއެމުން ކުރިއަށްގެންދިޔަ ޓެލެތޯނަށް ލިބުނު 19.1 މިލިއަން ރުފިޔާ ފަންޑާ ހަވާލުކުރެވުނުތޯ ސުވާލުކުރަން ފޮރިން މިނިސްޓަރު ޑރ. އަބްދުﷲ ހަލީލް ރައްޔިތުންގެ މަޖިލީހަށް ހާޒިރުކުރަން ހުށަހަޅައފިއެވެ.

މިނިސްޓަރު ހަލީލް ހާޒިރުކުރަން ހުށަހެޅީ ގަލޮޅު ދެކުނު ދާއިރާގެ އެމްޑީޕީ މެމްބަރު މީކާއީލް އަހްމަދު ނަސީމެވެ.

މީކާއިލް މިނިސްޓަރު ހަލީލްއާކުރާ ސުވާލުގައި ބުނެފައިވަނީ ޖޫން 13 ގައި ކުރިއަށް ގެންދިޔަ ޓެލެތޯންއިން ލިބުނު ފައިސާ ފަލަސްތީން ރައްޔިތުންނަށް އެހީވާ ފަންޑާ ހަވާލުކުރެވިއްޖެތޯ އާއި އެ ފައިސާ ހަވާލުނުކުރެވޭނަމަ އެކަމަށް 4 މަސް ދުވަހަށް ވުރެ ދިގު މުއްދަތެއް ފާއިތުވެފައިވާ ސަބަބު ސާފުކޮށްދެއްވުމަށެވެ.

އެ ފައިސާ ފަލަސްތީން ރައްޔިތުންނަށް ރައްދުކުރެވޭނެ ތާރީހެއް ސާފުކޮށްދެއްވުމަށް ވެސް މީކާއިލްގެ ސުވާލުގައިވެ އެވެ.

މިދިޔަ އޮގަސްޓް މަހުގެ 20 ވަނަ ދުވަހު އެ ފައިސާ  އދ. ގެ ޖަމިއްޔާ ޔުނައިޓެޑްނޭޝަންސް ރިލީފް އެންޑް ވޯކްސް އެޖެންސީ ފޯ ޕަލަސްޓައިން ރެފިއުޖީސް (އަންރުއާ) އާ ހަވާލުކޮށްފައިވާ ކަމަށް ފޮރިން މިނިސްޓްރީން ވަނީ ބުނެފަ އެވެ. ނަމަވެސް މިކަމުގެ އިތުރު ތަފްސީލެއް ހާމަކޮށްފައިނުވާތީ ގިނަ ބަޔަކު އަންނަނީ އެ ފައިސާ ދިންތޯ ޔަގީންކުރަން ބޭނުންވާކަމަށް ބުނަމުންނެވެ.