ރައްޔިތުންގެ މަޖިލީހުގެ މީޑިއާ އެންޑް ކޮމިއުނިކޭޝަން ޑިރެކްޓަރުގެ މަގާމުގައި ހުންނެވި ހަސަން ޒިޔާއު، އެ މަގާމުން ވަކި ކޮށްފިއެވެ.

މަޖިލީހުގެ އަމީން އާންމު ފާތިމަތު ނިއުޝާއާ ހަވާލީދީ ބައެއް މީޑިޔާތަކުގައި ރިޕޯޓިކޮށްފައިވާ ގޮތުގައި ޒިޔާއު އެ މަގާމުން ވަކިކުރީ ޕާލިމަންޓަރީ ސާވިސްގެ ކޯޑް އޮފް ކޮންޑަކްޓާ ހިލާފުވުމުގެ ސަބަބުންނެވެ.

މަގާމުން ވަކިކުރުމާއި ގުޅިގެން ޒިޔާ މިހާރު ވަނީ މަޖިލީހުގެ އިދާރީ ގުރޫޕްތަކުން ވެސް ބޭރުކޮށްފަ އެވެ. މަޖިލީހުގެ މަސައްކަތްތަކުގެ މައުލޫމާތު ހިއްސާ ކުރުމަށް ނޫސްވެރީންނާ އެކު މަޖިލީހުގެ އިދާރާ އިން ހަދާފައިވާ ވަޓްސްއަޕް ގުރޫޕް ގައި މިއަދު ހެނދުނު ވެސް ޒިޔާއު މެސެޖެއް ހިއްސާ ކުރި އެވެ. އެއީ މިއަދު އެމްޑީޕީގެ ޕާލިމަންޓަރީ ގުރޫޕްގެ ޕްރެސް ކޮންފަރެންސް އެއް ތާވަލު ކޮށްފައިވާތީ އެ މައުލޫމާތެވެ.

މިކަމާ ގުޅިގެން ޒިޔާއު ވިދާޅުވީ ރައްޔިތުންގެ މަޖިލީހުގެ މީޑިއާ އެންޑް ކޮމިއުނިކޭޝަން ޑިރެކްޓަރުގެ މަގާމުން އޭނާ ވަކިކުރީ، ޕާލަމެންޓަރީ ސަރވިސްގެ ޤާވާއިދާ ޚިލާފަށް ކަމަށެވެ. އެގޮތުން އެ ޤާވާއިދުގައި ބަޔާންކުރާ އިޖުރާޢަތްތަކާ ދެކޮޅަށް، ނޯޓިސް ދިނުމަކާ ނުލާ އަވަސް އަރުވާލައިގެން ވަޒީފާއިން ވަކިކުރުމުގެ މަޤްސަދުގައި ޕާލަމެންޓަރީ ސަރވިސް ގަވާއިދުގެ ކޯޑު އޮފް ކޮންޑަކްޓާ ޚިލާފުވިކަމަށް ބުނެ ވަކިކޮށްފައި ވަނީ ރައްޔިތުންގެ މަޖިލީހުގެ އިދާރާގެ އިސްވެރިން، ޚާއްސަކޮށް މަޖިލީހުގެ ޢަމީން އާންމު ފާތިމަތު ނިއުޝާއާއި ޑެޕިއުޓީ ސެކްރެޓަރީ ޖެނެރަލް މުޙައްމަދު ރަޝީދު އާއި ހެޑް އޮފް އެޑްމިނިސްޓްރޭޝަން އަހުމަދު ފާއިޒު އަދި ޑިރެކްޓަރ ފޮރިން ރިލޭޝަންސް ޒުއްޔިނާ ބަދުރީގެ ބައެއް ނިންމުންތަކާ ދެކޮޅަށް އަޅުގަނޑު ވާހަކަ ދައްކާފައިވާތީ، ޒާތީ ހަސަދަވެރިކަން ފިލުވުމަށްކަމަށް ދެކޭކަމަށާ އަދި ބެކް ޑޭޓްކޮށް ބައެއް ޕްރޮކިއުމަންޓް ރިކުއެސްޓްތަކުގައި ސޮއި ކުރުމަށް ދެކޮޅު ހަދާފައިވާތީ ކަމަށް ދެކޭ ކަމަށްވެސް ޒިޔާއު ހާމަކުރައްވާފައިވެއެވެ.

ޓީވީ ހުށައެޅުންތެރިއެއްގެ ގޮތުގައި ބޮޑު މަގުބޫލު ކަމެއް ހޯދި ޒިޔާއު މަޖިލީހުގެ އިދާރާގައި މަސައްކަތް ކުރާތާ އަހަރުތަކެއްވެއްޖެއެވެ.