ސަހްޔޫނީންގެ ޕާސްޕޯޓް މަނާނުކޮށް ލަސްވާތީ، އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ހޯމަ ދުވަހު މަޖިލީހަށް ހުށަހެޅި ކުއްލި މައްސަލަ ބަލައިނުގަނެ ބޭރުކޮށްލުމުން މަޖިލިސް ރައީސް އަބްދުއްރަހީމް އަބްދުﷲ (އަދުރޭ) އަށް ރައީސް އަބްދުﷲ ޔާމީން އަބްދުލްގައްޔޫމް ފާޑުވިދާޅުވެއްޖެ އެވެ.

ސަހްޔޫނީންގެ ޕާސްޕޯޓް މަނާނުކޮށް ލަސްކުރަމުންދާތީ ކަންބޮޑުވުންފާޅުކޮށް ރައީސް ޔާމީން ވާހަކަދައްކަވާފައި ވަނީ ހޯމަ ދުވަހުގެ ރޭ ޕީއެންއެފުން އެ ޕާޓީގެ އޮފީހުގައި ބޭއްވި ޖަލްސާގައެވެ.

އެގޮތުން އެމަނިކުފާނު ވިދާޅުވީ މިއޮތްހާ ދުވަސް ވޭތުވެިގެން މިދިޔައީ ސަހްޔޫނީންގެ ޕާސްޕޯޓް މަނާނުކޮށް ބަހަނާއަކަށްފަހު ބަހަނާއެއް ދެއްކުމުގައިކަމަށެވެ.

އެ މައްސަލަ ލަސްވެގެން އެމްޑީޕީގެ ފަރާތުން މަޖިލީހުގައި މައްސަލަ އަވަސްކޮށްދިނުމަށް އެދުމުން އެނގޭހާވެސް އެއްޗަކީ އެ ހިތްވަރެއް ޕީއެންސީ މެމްބަރުންގެ ގައިގައި ނެތްކަންކަމަށް ވިދާޅުވެ އެމަނިކުފާނު ވަނީ ސަރުކާރަށް ނިސްބަތްވާ މަޖިލިސް މެމްބަރުންނަށް ވަރަށް ބޮޑަށް ފާޑުވިދާޅުވެފައެވެ.

ސަރުކާރުން ތިބީ ފަލަސްތީނުގެ މީހުންގެ ހައްގު ހިމާޔަތްކުރުމަށް ކަމަށް އަބަދުވެސް ބުނާތީ އެވާހަކަ އަކާ އަމަލާ ދިމާވާ މަންޒަރު ނުފެންނަކަމަށް ވިދާޅުވެ ރައީސް ޔާމީން ވަނީ ރައީސް މުއިއްޒުގެ އިތުރުން ސަރުކާރުގެ އިސް ފަޑިއަށް ވަރަށް ބޮޑަށް ފާޑުކިޔުން އަމާޒުކުރައްވާފައެވެ.

ހޮނިހިރު ދުވަހުގެ ހަވީރު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ސަހްޔޫނީންގެ ޕާސްޕޯޓް މަނާކުރުން އަވަސްކުރުމަށް ސަރުކާރުން މަޖިލީހަށް އަންގާނެތޯ ކުރި ސުވާލަށް ޖަވާބުދެއްވަމުން ބަންޑާރަ ނައިބު އަހުމަދު އުޝާމް ވިދާޅުވީ ރައްޔިތުންގެ މަޖިލީހަށް ކަންކުރަންވާގޮތް ސަރުކާރުން ނާންގާނެކަމަށެވެ. މި ވާހަކައަށް އިޝާރާތް ކުރައްވާ ރައީސް ޔާމީން ވިދާޅުވީ ބަންޑާރަ ނައިބުވެސް ވާހަކަ ދައްކަވަނީ ހިތުހުރިގޮތަކަށްކަމަށެވެ. މަޖިލީހުގައި އެޖެންޑާ ކުރެވޭ ކަންކަމަކީ ސީދާ ރައީސް އޮފީހުން އަންގާ ކަންކަން ކަމަށް ވިދާޅުވެ ރައީސް ޔާމީން ވަނީ ބަންޑާރަ ނައިބު އުޝާމަށް ފާޑުވިދާޅުވެފައެވެ.