ދުންފަތުގެ ބާވަތްތަކުން ނަގާ ޓެކްސް ބޮޑު ކުރުމުގެ ބިލު ރައްޔިތުންގެ މަޖިލީހަށް ހުށަހެޅުއްވީ، ޓެކްސް ނެގުމަކީ ފޭރުން ކަމަށް ވިދާޅުވެ، ޓެކްސް ނެގުމާ ދެކޮޅަށް މީގެ ކުރިން ފާޑުވިދާޅުވި މެންބަރު އިބްރާހިމް މުހައްމަދުކަން ހާމަވެއްޖެ އެވެ.

ދުންފަތުގެ ހުރިހާ ބާވަތްތަކާއި ވޭޕުން ނަގާ ޓެކްސް ނޮވެމްބަރު 1، އިން ފެށިގެން ބޮޑު ކުރުމުގެ ބިލެއް ރައްޔިތުންގެ މަޖިލީހަށް ހުށަހަޅާފައި ވަނީ ސަަރުކާރުގެ ފަރާތުން ހޯމަ ދުވަހުގައެވެ. އެ ބިލަށް ބަހުސް ކުރައްވާފައި ވަނީ އަންގާރަ ދުވަހުއެވެ. އެ ބިލު ހުށަހަޅުއްވަމުންމެންބަރު އިބްރާހިމް ވަނީ ޓެކްސް ބޮޑު ކުރަނީ ދައުލަތަށް ލިބޭ އާމްދަނީ ބޮޑުކޮށް ސަރުކާރަށް ނަފާ ހޯދަން ކަމަށް ވިދާޅުވެފަ އެވެ.

ޓެކްސް ނަގާތީ އެކަމަކީ ފޭރުން ކަމަށާއި ބަލައިގަނެވޭނެ ކަމެއް ނޫންކަމަށް ވިދާޅުވެ އެންމެ ގަދަޔަށް އަޑު އުފުލީ ވެސް މެމްބަރު އިބްރާހިމެވެ. އެގޮތުން ޖޫން 2013 ގައި މެމްބަރު އިބްރާހިމް އެކްސްގައި ކުރެއްވި ޕޯސްޓެއްގައި ވިދާޅުވެފައި ވަނީ ޓެކްސް ނެގުމަކީ ސިސްޓަމެޓިކްކޮށް ފޭރުންކަމަށެވެ. މި ހަގީގަތް ބަދަލެއް ނުކުރެވޭނެކަމަށާއި އެއީ އެއްވެސް ރައްޔިތަކު ބޭނުންވެގެން ކުރި އަދި ކުރާ ކަމެއް ނޫންކަމަށެ އެ ޕޯސްޓްގައި ވެއެވެ.

ސަރުކާރުން ނިންމާފައި ވަނީ ނޮވެމްބަރު 15، އިން ފެށިގެން ވޭޕް އެތެރެ ކުރުން މަނާކޮށް، ޑިސެމްބަރު 15، އިން ފެށިގެން ވޭޕް ބޭނުން ކުރުން ވެސް މަނާ ކުރުމަށެވެ. އަދި ދުންފަތާއި ސިނގިރޭޓުން ނަގާ ޓެކްސް ނޮވެމްބަރު 1، އިން ފެށިގެން ބޮޑު ކުރަން ވެސް ވަނީ ނިންމައިފަ އެވެ.

ސަރުކާރުން ނިންމީ ސިނގިރޭޓަކުން މިހާރު ނަގާ 3ރ. ގެ ޓެކްސް އަށް ރުފިޔާއަށް ބަދަލުކޮށް، ދުންފަތުގެ އެހެން ބާވަތްތަކުން ނަގާ ޑިއުޓީ 50 ޕަސެންޓު ބޮޑު ކުރުމަށެވެ.

ސަރުކާރުގެ މި ނިންމުމަށް ގިނަ ބަޔަކު ފާޑުކިޔަމުންދާ މައިގަނޑު އެއް ސަބަބަކީ ސިނގިރޭޓު މަނާނުކޮށް، ވޭޕް މަނާކުރުމެވެ. ސިނގިރޭޓަކީ ވެސް ސިއްހަތައް އެހާމެ ނުރައްކާތެރި އެއްޗަކަށް ވާއިރު ވޭޕާއެއްކޮށް ސިނގޭރަޓަކީ ވެސް މަނާކުރެވެން ޖެހޭނެ އެއްޗެއް ކަމަށް ގިނަ ބަޔަކު ބުނެއެވެ.