ސަރުކާރުގެ ތެރޭގައިވާ ކަންކަން އޮޅުން ފިލުވުމަށްޓަކައި ރައީސް އޮފީހުގެ އިސް ތަރުޖަމާނު ހީނާ ވަލީދާ ކުރާ ސުވާލުތަކަށް ޖަވާބު ނުދެވޭކަން ހާމަވެއްޖެ އެވެ.

މީގެ ކުރިން ވެސް ތަރުޖަމާނު ހީނާގެ ފަރާތުން ޖަވާބު ނުލިބޭ ވާހަކަ އަކީ ދެކެވިފައިވާ ވާހަކައެކެވެ. އެހެންނަމަވެސް ސަރުކާރު ތެރޭގައި ވާކަންކަން އޮޅުން ފިލުވުމަށްޓަކައި މިފަހުން ވެސް "ތޭރަ އޮންލައިން" ގެ ފަރާތުން ހީނާއަށް ކުރި އެއްވެސް މެސެޖެއްގެ ޖަވާބު ހީނާ ދެއްވާފައި ނުވެއެވެ. އަދި ގުޅުމުން ފޯނު ވެސް ނުނަންގަވާކަން ފާހަގަކޮށްލެވެ އެވެ.

ރައީސް އޮފީހުގެ އިސް ތަރުޖަމާނުގެ މަގާމުގެ މަސްއޫލިއްޔަތަކީ ހާމަކުރަން ޖެހޭކަންކަން ނޫސްވެރިންނަށާ ރައްޔިތުންނަށް ހާމަކުރުމެވެ. އެގޮތުން ކަމަކާ ގުޅޭ ގޮތުން ދެވޭނެ ޖަވާބެއް ނެތިއްޔާ ޖަވާބެއްް ނެތްކަން ވެސް ދަންނަވަން ޖެހެއެވެ. ނަމަވެސް ހީނާ ކަންތައް ކުރައްވަމުން ގެންދަވަނީ މަގާމުގައިވާ މަސްއޫލިއްޔަތުތަކާ ވަރަށް ބީރައްޓެހިކޮށެވެ.

ރައީސް އޮފީހުގެ ސިޔާސީ މަގާމަށް ފަރާތެއް އައްޔަން ކުރެވުނުތޯ އެހުމުން ވެސް އެ ސުވާލަށް ވެސް ހީނާ ޖަވާބު ދެއްވާފައި ނުވެއެވެ. މި ސަރުކާރަކީ ހާމަކަންބޮޑު ސަރުކާރެއްގެ ގޮތުގައި ދައުވާކުރަމުން އަންނަ ސަރުކާރެކެވެ. ނަމަވެސް ސަރުކާރަށް އަހަރެެއް ވާން ކައިރިވެފައިވާއިރު ވެސް ސަރުކާރު ތެރެއިން ހާމަވި އެއްވެސް ކަމެއް ނެތެވެ.

ނޫސްތަކުން ކުރާ ސުވާލުތަކަށް ޖަވާބު ދިނުމުގެ ބަދަލުގައި ތަރުޖަމާނު ހީނާ އަދި ސަރުކާރުގެ އިސްވެރިން މަސައްކަތް ކުރަނީ ނޫސްތަކަށް ފިޔަވަޅު އެޅޭތޯއެވެ. އެގޮތުން ރައީސް މުއިއްޒުގެ އަގު ވައްޓާލަން ބައެއް ނޫސްތަކުން މަސައްކަތް ކުރާ ކަމަށްބުނެ މަޖިލީހަށް ރައީސް އޮފީހުން ވަނީ ދާދިފަހުން ސިޓީއެއް ވެސް ހުށަހަޅާފައެވެ.