ގައުމީ ހެލްތު އިންޝުއަރެންސް (އާސަންދަ)އިންގެ ތެރެއިން ވަކި ބަޔަކަށް ޚިދުމަތް މެދުކަނޑާލުމަށް ސަރުކާރުން ގޮވާލާފައިވުމުން ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެމްބަރު މުހައްމަދު ވަހީދު (ވައްޑެ)ގެ ނުރުހުން ސަރުކާރަށާ ރައީސް މުހައްމަދު މުއިއްޒަށް އަމާޒުކުރައްވައިފިއެވެ.

ދުންފަތުގެ އިސްތިއުމާލު ކުރާ މީހުންނަށް އާސަންދަ ހިދުމަތް ދޭތީ ވެރިކަން ކުރާ ޕީއެންސީގެ މަޖިލިސް މެންބަރުން އެކަމުގެ ނުރުހުން ފާޅުކުރި ކަމަށް އޮންލައިން ނުހެއްގައި އޮތް ޚަބަރެއް ހިއްސާކޮށް އެކްސްގައި ވަްޑެ ކުރެއްވި ޕޯސްޓެއްގައި ވިދާޅުވީ، އިންތިޚާބުގެ ދުވަސްވަރު ވޯޓު ހޯދުމަށް ދެއްކީ ދުބާއީއާ ބެންކޮކް ފަދަ ތަރައްގީވެ ކުރިއަރާފައިވާ ގައުމުތަކަށް އާސަންދަ ފުޅާކުރާ ވާހަކަ ކަމަށެވެ.

ރައީސް މުއިއްޒު ޗައިނާއަށް މިދިޔަ އަހަރުގެ ޑިސެމްބަރު މަހު ކުރެއްވި ދަތުރުފުލަށް ވަޑައިގެން އެއާރޕޯޓުގައި ހުންނަވާ އާސަންދައާ ގުޅިގެން ދެއްކެވި ވާހަކަތަކުގެ ވީޑިއޯވެސް ހިއްސާކުރައްވާ ވައްޑެ ވިދާޅުވެފައިވަނީ، މިހާރު އެކި ބަހަނާ ސަރުކާރުން ދައްކަނީ އާސަންދަ އެއްކޮށް ކަނޑާނުލެވިގެންކަމަށާ ވެރިންގެ ކިބައިން ފެންނަމުންދަނީ ދޮގާ މަކަރުގެ އިންތިހާ ކަމަށެވެ.

ހަމަ ހަމަކަމާއެކު ހުރިހާ ރައްޔިތުންނަށް ލިބޭ އާސަންދަ ވަކިބަޔަކަށް ނުދިނުމަށް ސަރުކާރު މެންބަރުން ވާހަކަ ދައްކަވާއިރު، މަޖިލިސް މެންބަރުންނާއި އާއިލާއަށް އަދި ކުރީގެ މެންބަރުންނަށް ވެސް އާސަންދައިގެ އިތުރުން ވަކި ހެލްތު އިންސުއަރެންސްއެއް ލިބޭކަން ފާހަގަކޮށްލެވެއެވެ.