މަސްވެރިންނަށް ޙައްގުވާ ފައިސާ ނުލިބޭތީ އަނެއްކާ ވެސް ޝަކުވާ ބޮޑުވެއްޖެއެވެ.

އެގޮތުން މަސްވެރިން ބާނާ މަސް ކިރާތާ 48 ގަޑި އިރު ތެރޭ މަސްވެރިންނަށް ހައްގުވާ ފައިސާ އެ ފަރާތްތަކަށް ދޫކުރާނެ ކަމަށް ރައީސް ޑރ މުއިއްޒު ވައުދުވެވަޑައިގެންނެވި ނަމަވެސް ވެރިކަމަށް އަހަރެއް ވެގެން ދާއިރު އަދިވެސް މަސްވެރިން ކުރަމުން އަންނަ ޝަކުވާ އަކަށް ބަދަލެއް ނާދެއެވެ.

މަސްވެރިންނަށް ފައިސާ ހަމައަށް ދޫނުކުރާތާ 27 ދުވަސް ވެފައިވާ ކަމަށް ބުނެ މަސްވެރިން އަންނަނީ ސޯޝަލް މީޑިޔާގައި ސަރުކާރާއި ދެކޮޅަށް ޕޯސްޓްތައް ކުރަމުންނެވެ.

މިގޮތުން، ރައީސް މުއިއްޒުގެ ބަހާއި އަމަލު ދިމާނުވާ ކަމަށް ބުނެ މުއިއްޒުއަށް ގިނަ ބަޔެއްގެ ފާޑު ކިޔުން އަންނަނީ އަމާޒުވަމުންނެވެ.

މަސްވެރިންގެ ވޯޓުން ވެރިކަމަށް އައިސް މަސްވެރިން ނިކަމެތިކޮށް، މަސްވެރިންގެ އާއިލާތައް ބިކަކޮށްފައިވާ ކަމަށް އެފަރާތްތަކުގެ ޕޯސްޓްތަކުން ބުނެފައިވެއެވެ.

މަސްވެރިންނަށް ފައިސާ ނުދޭ މައްސަލައިގައި މީގެ ކުރިންވެސް ރާއްޖޭގެ އެކި ސަރަހައްދުތަކުގައި މަސްވެރިން ވަނީ އިހުތިޖާޖުތައްކޮށްފައެވެ. މަސްވެރިން މުޒާހަރާ ކުރުމުން ނޫނީ ކޮންމެ ފަހަރަކު ސަރުކާރުން އެ ފަރާތްތަކަށް ހަމައަށް ލާރި ނުދެވޭކަންވެސް މަސްވެރިން އަންނަނީ ބުނަމުންނެވެ.