ރިޔާސީ އިންތިޚާބުގައި ރައްޔިތުން ދިން މެންޑޭޓާ ރައީސް ޑރ މުހައްމަދު މުއިއްޒު ޚިލާފުވެއްޖެކަމަށާ އެހެންކަމުން އެމަނިކުފާނަށް ވެރިކަމުގައި ހުރުމުގެ ހައްގެއް ނެތް ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައިވަނީ ހޯމަ ދުވަހުގެރޭ ޕީއެންއެފް އޮފީހުގައި އޮތް ޖަލްސާގައި އޯޑިއެންސްގައި އިންނަވާ ދެއްކެވި ވާހަކަފުޅުގައެވެ.

އެގޮތުން ޖަލްސާގެ ތެރެއިން ދެއްކި ވީޑިއޯ ކްލިޕަކަށް އިޝާރާތްކުރައްވާ ރައީސް ޔާމީން ވިދާޅުވީ އެ ވީޑިއޯގައިފެނިގެން ދަނީ އެއްވެސް މަޖްބުރުކަމެއް ނެތި ރައީސް މުއިއްޒު ވާހަކަ ދައްކަވަމުން ގެންދެވި މަންޒަރު ކަމަށެވެ.

އެގޮތުން ދިވެހިރައްޔިތުން ތިމަންނަ ހޮވީ އިންޑިއާ ސިފައިން ބޭރުކުރާނެކަމަށް ބުނުމުންކަމަށް ރައީސް މުއިއްޒު ބީބީސީއަށް ދެއްވި އިންޓަރވިއުގައި ވިދާޅުވިކަން ފާހަގަކުރައްވާ ރައީސް ޔާމީން ވިދާޅުވީ، އިންޓަރވިއުގައި ފެންނަނީ ރައީސް މުއިއްޒު ހިތުގެ އަޑިން ދެއްކެވި ވާހަކަ ކަމަށާއި، ވިދާޅުވަމުން ގެންދެވީ އިންޑިއާގެ އަސްކަރިއްޔާގެ ބޫޓެއް ދިވެހި ފަސްގަނޑުގައި ހުންނާކަށް ބޭނުންފުޅުނުވާ ކަމަށެވެ. އަދި ރައްޔިތުން އެމަނިކުފާނު އިންތިހާބުކުރެއްވީވެސް އެ ސަބަބަށްޓަކައި ކަމަށް އެމަނިކުފާނު ވިދާޅުވަމުން ގެންދެވި ކަމަށެވެ.

އަދި ރައީސް މުއިއްޒު ދައްކަވާ ވާހަކަފުޅާއި، މޫނުމަތީގައި ފެންނަ އިހުސާސްތަކާއި ޝުއޫރުތަކާއި، ބޮޑީ ލެންގުއޭޗް ފެންނަ ކަމަށެވެ. އަދި ދެއްކެވި ވާހަކަފުޅަކީ ޖަޒުބާތާއެކީ ހިތުގެ އަޑިން ދެއްކެވި ވާހަކަފުޅެއް ކަމަށާއި، އިންޑިއާ އައުޓް ޖަހައިގެން އުޅުނީ މަޖުބޫރުވެގެން ކަމަށް ވާހަކަތަކުން ހާމަނުވާ ކަމަށް ރައީސް ޔާމީން ވިދާޅުވިއެވެ.

އެހެންކަމުން މިއަދު އެ ވާހަކަތަކާ ޚިލާފަށް އަދި ރައްޔިތުންގެ އިހްސާސުތަކާ ރައީސް މުއިއްޒު ދެކޮޅުވެވަޑައިގެންފައިވާކަން އިންޑިއާއާއެކު ބާއްވަމުންދާ ގުޅުމުން ފެންނަކަމަށާ އެހެންކަމުން މިހާރު ރައީސް މުއިއްޒު ހުންނެވީ ރައްޔިތުން ދިން މެންޑޭޓާ ޚިޅާފުވެފައި ކަމަށް ވެސް ރައީސް ޔާމީން ވިދާޅުވިއެވެ.

ރައީސް ޔާމީން އިތުރަށް ވިދާޅުވީ އޭރު އެ އިންޓަވިޔުގައި ރައީސް މުއިއްޒަށް ރައްޔިތުން ވޯޓު ދިން އެއް ސަބަބުގެ ތެރޭގައި "އިންޑިޔާ އައުޓް" ހިމެނޭކަމަށް ވިދާޅުވެ، އިއުތިރާފްވެފައިވާއިރު މިއަދު އެހެން ބުނަންވެސް ރައީސް މުއިއްޒަށް ކެރިވަޑައިނުގަންނަވާނެެއެވެ.

ބީބީސީއަށް ރައީސް ޑރ. މުހައްމަދު މުއިއްޒު ދެއްވި ބަސްދީގަތުމުގައި ވިދާޅުވީ އެމަނިކުފާނަކީ "ޕްރޯ މޯލްޑިވްސް" ބޭފުޅެއް ކަމަށާއި އެމަނިކުފާނަށް އެންމެ ފުރަތަމަ އަންނާނީ ދިވެހި ގައުމާއި މިނިވަންކަން ކަމަށެވެ. ބީބީސީގެ އިންޓަރވިއުގައި މުއިއްޒު ވިދާޅުވެފައިވަނީ ދިވެހި ފަސްގަނޑުގައި ބޭރުގެ އަސްކަރިއްޔާގެ އެންމެ މީހެއްގެ ބޫޓެއް ވެސް ހުންނަން ބޭނުންފުޅު ނުވާ ކަމަށެވެ. އަދި ދިވެހި ރައްޔިތުންނަށް ވީ ވައުދު ވެރިކަމުގެ އެންމެ ފުރަތަމަ ދުވަހުން ފެށިގެން ފުއްދަވާނެ ކަމަށް އެމަނިކުފާނު ވިދާޅުވިއެވެ. ނަމަވެސް ވެރިކަމަށް ވަޑައިގެން އެރާގުވަނީ ބަދަލުކުރައްވާފައެވެ.