ނިމި ދިޔަ ފަސް އަހަރުގައި ގައުމުގެ ވެރިންގެ ކިބައިން ފެނިގެން ދިޔައީ ވަރަށްވެސް ޒިންމާދާރުކަން ކުޑަ އަމަލުތަކެކެވެ.

އެގޮތުން އިލެކްޝަން ކޮމިޝަންގައި ހުރި މީހަކު ހުޅުވާލަދިން ކުޑަދޮރަކުން ވަދެ އިންޑިއާގެ އެހީތެރިކަމާ އެކު 2018 ގައި ވަގަށް ނެގި ވެރިކަމާ އެކު މުޅި ގައުމު ހިތަކަށް ލިބުމުން ރައްޔިތުންގެ ކަންކަމަށް އިހުމާލުވެ ތިމަތިމާމެންގެ އަންބޮނޑި ބޮޑުކުރުމުގައި މެކުހަށް ޖެހިއެވެ. ބިޔަ ބޮޑު ބަޖެޓުތައް ހުސްކޮށް ދެން ފެށީ ކުރީ ސަރުކާރުން ކަންކަން ކޮށްފައި ހުރި ގޮތން ރައްޔިތުންނަށް ޚިދުމަތްކޮށްދިނުމުގައި އުނދަގޫ ވަނީ ކަމަށް ބުނެ ބަހަނާ ދައްކަންށެވެ.

އެކަންކަމާ ގުޅިގެން އޭރުގެ އިދިކޮޅުގައި ތިބެ ޕީއެންސީގެ ވެރިން ގެންދިޔައީ ނުހަނު ބޮޑަށް އެކަންކަން ކުށްވެރިކުރަމުންނެވެ. އަދި ކުރީ ސަރުކާރާ ކަންކަން ޖާމިނުނުކޮށް ވެރިކަން ކުރަން ނޭނގޭ ނަމަ އިސްތިއުފާދީފައި ރައިސް އިބްރާހިމު ގެއަސް ވަޑައިގެންނެވުމަށްވެސް އެތައް ފަހަރަކު ގޮވާލިއެވެ.

2023 ގެ ރިޔާސީ އިންތިހާބުގެ ތެރޭގައި ވެސް ޕީއެންސީއިން އެންމެ ބޮޑަށް ދެއްކި އެއް ވާހަަކއަކީ އެމްޑީޕީއަށް ގައުމު ހިންގަން ނޭނގުމުގެ ނަތީޖާއަކީ ގައުމުގައި ދަރަނި އިންތިހާއަށް ބޮޑު ރައްޔިތުންނަށް އެކަމުގެ ސަބަބުން ކުރާ ނޭނދެވޭ އަސރެވެ. އެގޮތުން އިންވެސްޓަރުންގެ އިތުބާރު ރާއްޖެއަށް ގެއްލި ތަރައްގީގެ މަޝްރޫއުތައް ގައުމުގައި ހުއްޓިފައިވާކަން ވެް ފާހަގަކުރިއެވެ. އަދި އެކަންކަމުން ގައުމު ސަލާމަތްކޮށް އަރަނީގައި ގައުމު ހިންގޭނީ ޕިއެންސީއަށް ވެރިކަން ލިބިގެން ކަމަށް އޭރު ދައުވާ ކުރިއެވެ.

ލިބިފައިވާ ނިކަން ކުލަ ގަދަ ފެހި ސިގްނަލްތަކާއެކު ރައްޔިތުންނަށް އުފާވެރިކަން ގެެނސްދޭނެކަމުގެ ވައުދާ ގައުމުގެ މިނިވަންކަން ހިމާޔަތްކޮށް އަލުވެތިކަމުން ސަލާމަތްކުރުމުގެ ވައުދުތައް ފަދަ ވައުދުތަކުން ރައްޔިތުންނަށް ގެނުވި އުއްމީދާއެކު ވެރިކަން ފުރޮޅާލީ ރައްޔިތުންގެ ބާރުންނެވެ.

ދެން ކަންވީ ކިހިނަކުންތޯއެވެ؟ އާދޭހެވެ. ދުރަތަމަ ކޮޅު ހީވީ ހަމަ އެހެން ފަދަ ކަމެއް ހެންނެވެ. ތިމަންނަމެން ކުޑަޔަސް ބުލީއެއް ނުކުރެވޭނެއޭ ތިމަންނަ މެންނަށް ގައުމު ހިންގޭނެއޭ ކިޔާ ރައްޔިތުންނަށް ދެއްކީ ދަޅަތަކެކެވެ.

ވެރިކަމުގެ ހުރިހާ ބާރެއްހެން މުށުތެރެއަށް ލެވުމުން ދެން ފެންނަން ފެށީ ވެރިންގެ އަސްލު ސިފައެވެ. އަބްދުﷲ ޝާހިދުއަށް ފާޑުކީ މީހުން ހަމަ އެ އުސޫލުން ރައްޔިތުންގެ ފައިސާގައި ދުނިޔެ ވަށާ ބުރުޖަހަން ފެށިއެވެ. ޗައިނާއާ ތުރުކީއާ ދުބާއީއާ މިހެން ގޮސް ކިޔާފައި ނުކިޔާނެ ތަނެއް ނެތެވެ. ނަމަވެސް އެނބުރި އައީ ހުސް އަތާއެވެ.

ދައުލަތުގެ ބަޖެޓު މިހެން ތަޅާ ބުރުއްސުމަށްފަހު ދެން އަނެއްކާވެސް މި އަޑު އިވެނީ އެ ރޯޅި ކުރީ ސަރުކާރަށް ބާލަން ފެށި އަޑެވެ. ގައުމުގެ ދަރަނި އިންތިހާކަމަށް ބުނެ އެކި ކަންކޮޅުތަކުގެ ހުރި ތަރައްގީގެ މަޝްރޫއުތައް ހުއްޓާލީ، ސިޔާސީ މުވައްޒަފުންނަށް މުސާރަ ނުދެވިދާނެތީއެވެ. އެކަން ކނަޑާލީ ކުރީ ސަރުކާރު ބޮލަށެވެ. އެގޮތުން ބުނަމުން ދިޔައީ މާބޮޑެތި އަގުގައި އެވޯޑުކޮށްފައި ހުރީ ކަމަށެވެ.

ދެން މިހާރު އިވޭ އަޑަކީ ސަޕްލިމެންޓްރީ ބަޖެޓެއް ވެސް ހުށަހަޅަން ޖެހުނީ ކުރީ ސަރުކާރުގެ ސަބަބުން ކަމަށް ބުނާ އަޑެވެ.

އެގޮތުން ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށް ފަހު ސަރުކާރުގެ ހަރަދުތައް އިންތިހާއަށް ބޮޑުވެ މިއަހަރަށް ފާސްކުރި 49.8 ބިލިއަން ރުފިޔާގެ ބަޖެޓުން ދެކޮޅު ނުޖެއްސުމާ ގުޅިގެން 5.1 ބިލިއަން ރުފިޔާގެ ސަޕްލިމެންޓަރީ ބަޖެޓަށް ހުށަހަޅަން ޖެހުމުގެ އުޒުރަކަށް ދެއްކީ "ކުރީ ސަރުކާރު"އެވެ. ނަމަވެސް މިއީ ކުރީ ސަރުކާރުގެ ވާހަކަ ނުދައްކާނެ ކަމަށް ބުނެ އައި ބައެއްކަން އަނެއްކާވެސް ހަނދާން އައުކޮށްލަމެވެ.

އެގޮތުން ކުރީ ސަރުކާރުން މަޝްރޫއުތަކަށް އާދަޔާ ހިލާފު ކުދި އަދަދު ޖަހައި، ހަގީގަތާ ނުބައްދަލުވާނެހެން ބަޖެޓު ތައްޔާރު ކޮށްފައިވުމާ 2022 އަދި 2023 ގައި ވެސް ހަރަދު ކުޑަކުރުމުގެ ފިޔަވަޅުތަކަށް ބަލައި ބަޖެޓު ކޮށްފައިވާއިރު، އެއްވެސް ކަމަކަށް ތައްޔާރުވެފައި ނުވުމާ 2023 ގެ ހިސާބުތައް އެކައުންޓް ކުރުމުގައި ބޮޑެތި އަދަދުން ފަރަގު ހުރުމަކީ މި ސަރުކާރުން ކުރީ ސަރުކާރަށް ފޫޅު ކަނޑާލި ކަންކަމެވެ.

ނަމަވެސް ހިސާބުތައް އެކައުންޓް ކުރުމުގައި ގޯސް ހަދާފައިވާ ކަމުގެ ތުހުމަތުތައް އެމްޑީޕީން ދޮގުކުރެއެވެ. ބޮޑު ދެގެރި ތަޅަންފެށީއެވެ. ބާރު ކުރާނީ ކަށް ގަލަށްކަން ޔަގީނެވެ.

މި ސަރުކާރުން ކުރީ ސަރުކާރުގެ ވާހަކަދައްކާ ބަހަނާ ދައްކަމުންދާއިރު މި ސަރުކާރަކީ ދައުލަތުގެ މާލީ ހިސާބުވެސް ހާމަނުކޮށް ހުއްޓާލި އެންމެ ފުރަތަމަ ސަރުޚާރުކަން ފާހަގަކޮށްލެވެއެވެ. އެގޮތުން ސަރުކާރުން މިހެން ބަޔާންކުރިއިރު ޖޫން 20, ގެ ފަހުން ދައުލަތުގެ މާލިއްޔާއިން ހަރަދުކުރީ ކިހިނެއް ކަމެއް ނޭނގެއެވެ.

ކުރީ ސަރުކާރަށް ފޫޅު ކަނޑާ ކަންކަން ޖަހަމުން ދާއިރު ބަޖެޓުގައި ނުހިމަނާ މަޝްރޫއުތަކަށްވެސް ރައީސް މުއިއްޒު ވަނީ ފޮނި ކަނޑަން ދައުލަތުގެ ފައިސާއިން ޚަރަދުކޮށްފައެވެ. އެގޮތުން ރަސމާލެއަކީ އޭގެ އެއް ހެއްކެވެ.

އަހަރުގެ ބަޖެޓު ހުސްވެ ސަޕްލިމެންޓްރީ ބަޖެޓެއް ހުށހަެލުމަކި އައު ކަމެއް ނޫނަސް ކުރީ ސަރުޚާރާ އެކަންކަން ޖާމިނުކުރުމުން މި ސަރުޚާރުގެ ވެރިންގެ ފެންވަރު ހާމަވެއެވެ. ތިމަންނާމެންގެ ޏާގާބިލުކަން ފޮރުވަން ކުރީ ސަރުޚާރު ކުރީ ސަރުކާުރ ކިޔުން މި ސަރުކާރުގެ ވެސް އާދައަކށްވެ އަތްމަތީ ބަހަކަށް ވެއްޖެތާއެވެ.

ވެރިކަމަށް އަހަރެއްވަނީއެވެ. ކުރީ ސަރުކާރު ބޮލަށް ފޫޅު ކެނޑުން ހުއްޓޭނީ ކޮން އިރަކުބާއެވެ؟ ރައްޔިތުންނަސް ފައިދާ ހުރިކަމެއްގެ ފެހި ސިގްނަލެއް ސަރުކާރުން ދޭނީ ކޮންއިރަކުބާއެވެ؟