ދައުލަތުގެ ވެރިންގެ މުސާރަ ކުޑަ ކުރަން ކެރުނު ހަމައެކަނި ރައީސަކީ ޑރ.މުހައްމަދު މުއިއްޒު ނޫންކަން ރީޖިއަނަލް އެއާޕޯޓްސް ކޮމްޕެނީ ލިމިޓެޑް (އާރްއޭސީ) ގެ މެނޭޖިންގ ޑިރެކްޓަރ އަހުމަދު މުބީނަށް ނޭނގުނުކަން ހާމަވެއްޖެ އެވެ.
ޚަރަދު ކުޑަކުރުމުގެ ނަމުގައި ރައީސް ޑރ މުހައްމަދު މުއިއްޒު ވަނީ އެމަނިކުފާނުގެ މުސާރައިން 50 އިންސައްތަ ކުޑަކުރަން ނިންމާފައެވެ. އަދި ދައުލަތުގެ އެހެން ވެރިންގެ މުސާރައިން 10 އިންސައްތަ ކުޑަކުރުމަށް ވެސް ވަނީ ނިންމަވާފައެވެ.
މިކަމާ ގުޅިގެން މުބީން އޭނާގެ ފޭސްބުކް އެކައުންޓްގައި ކުރެއްވި ޕޯސްޓެއްގައި ވިދާުވީ ވެރިންގެ މުސާރައާ ކުޅެން ކެރުނު ހަމައެކަނި ރައީސަކީ ރައީސް މުއިއްޒުކަމަށެވެ. އެހެންނަމަވެސް އެއީ ދޮގެކެވެ.
އެގޮތުން 2014 ވަނަ އަހަރު ރައީސް އަބްދުﷲ ޔާމީން އަބްދުލްގައްޔޫމް ވަނީ އެމަނިކުފާނުގެ އެއް މަހުގެ މުސާރަ ޣައްޒާ ފަންޑަށް ހަދިޔާ ކުރައްވާފައެވެ. އަދި އޭގެ އިތުރުން އެމަނިކުފާނުގެ ޒައާމަތުގައި ސްޓޭޓް މިނިސްޓަރުންނާ، ޑެޕިޔުޓީ މިނިސްޓަރުންގެ މުސާރައިން އުނިކުރުމަށް ވެސް ރައީސް ޔާމީން އެންގެވިއެވެ.
ރައީސް ގެ މުސާރައަކީ އެއް ލައްކަ ރުފިޔާއެވެ. ނަމަވެސް ރައީސް ޔާމީން ގެންދެވީ ކޮންމެ މަހަކު ވެސް މުސާރައިގެ އެއްބައި ނަންގަަވަމުންނެވެ. އެއީ 50،000 ރުފިޔާއެވެ.
އެހެންކަމުން ދޭހަވަނީ މުސާރަ ކުޑަކުރަން ކެރުނު ހަމަ އެކަނި ރައީސަކީ ރައީސް މުއިއްޒު ނޫންކަމެވެ.
