މުސާރައިގެ އެއްބައި ނަގައިގެން ރައީސް ޑރ މުހައްމަދު މުއިއްޒު އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ (އަދުރޭ) އަށް ވާނެ ގެއްލުމެއް ނޯންނާނެކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.

ރައީސް ޔާމީން މިފަދައިން ވިދާޅުވެފައި ވަނީ ފްރޮންޓް އޮފީހުގައި ބުރާސްފަތި ދުވަހުގެ ރޭ ކުރިޔަށްދިޔަ ޖަލްސާގެ އޯޑިއަންސްގައި އިންނަވާ ދެއްކެވި ވާހަކަ ފުޅުގައެވެ.

މާލީ ހާލަތު ގޯސްކަމަށްބުނެ، ޚަރަދު ކުޑަކުރުމުގެ ނަމުގައި ރައީސް ޑރ.މުހައްމަދު މުއިއްޒު ވަނީ ދެ އަހަރު ވަންދެން އެމަނިކުފާނުގެ މުސާރައިގެ 50 އިންސައްތަ ނުނަންގަވަން ނިންމަވާފައެވެ. އަދި ދައުލަތުގެ ސިޔާސީ މަގާމުތަކުގައި ތިބި ފަރާތްތަކުގެ ވެސް މުސާރައިން 10 އިންސައްތަ ކަނޑާލުމަށް ވެސް ވަނީ ނިންމަވާފައެވެ. މިއާއެކު އަދުރޭ ވަނީ އޭނާގެ މުސާރާއިން ވެސް 50 އިންސައްތަ ނުނަންގަވާނެކަމަށް އިއުލާން ކުރައްވާފައެވެ.

މި ވާހަކަތަކަަށް އިޝާރަތް ކުރައްވާ ރައީސް ޔާމީން ވިދާޅުވީ އަދުރޭ އަދި މުއިއްޒު ކުރައްވައިގެން އުޅުއްވަނީ މާ މޮޅުކަމެއް ނޫންކަމަށެވެ. މިއީ ދެއްކުންތެރިކަމަށް ކުރިކަމެއްކަމަށާއި އެމީހުންގެ މުސާރައިން އެއްބައި ނުނެގިޔަސް އެ ދެމީހުންނަަށް ވާނެ ގެއްލުމެއް ނޯންނާނެކަމަށް ވިދާޅުވެ ރައީސް ޔާމީން ވަނީ އެ ނިންމެވުމަށް ފާޑު ވިދާޅުވެފައެވެ.

މުސާރައިގެ އެއްބައި ނަގައިގެން ވެސް ވާނެ ގެއްލުމެއް ނެތްކަން ހާމަވާ އެއް ސަބަބަކީ ރައީސް މުއިއްޒު ރައްޔިތުންގެ މަޖިލީހުގެ ޕީއެންސީ މެމްބަރުންނަ ކޮންމެ މަހަަކު އެ ދޭ ބައި ލައްކަ ރުފިޔާ ކަމަށާއި އަދުރޭ މެމްބަރުންނަށް ބަހަމުން ގެންދާ 20،000 ރުފިޔާކަމަށް ވެސް ރައީސް ޔާމީން ވިދާޅުވިއެވެ.

ސަރުކާރުގެ ސިޔާސީ މަގާމްތަކުގައި ތިއްބަވާ ފަރާތްތަކުން ރައިސް މުއިއްޒުގެ މި ނިންމެވުމަށް ތައުރީފު ކުރައްވަމުން އަންނައިރު ވެރިންގެ މުސާރައާ ކުޅުއްވެވި އެންމެ ފުރަތަމަ ރައީސަކީ ރައީސް ޔާމީނެވެ. އެމަނިކުފާނު ވަނީ ވެރިކަމާ ހަވާލުވެވަޑައިގެން ހިލާލީގެޔަށް ބަދަލުވެވަޑައިގަންނަވަންދެން މުސާރައިގެ އެއްބައި ނަންގަވާފައެވެ.

އަދި އޭގެއިތުރުން 2014 ވަނަ އަހަރު ރައީސް އަބްދުﷲ ޔާމީން އަބްދުލްގައްޔޫމް ވަނީ އެމަނިކުފާނުގެ އެއް މަހުގެ މުސާރަ ޣައްޒާ ފަންޑަށް ހަދިޔާ ކުރައްވާފައެވެ. އަދި އޭގެ އިތުރުން އެމަނިކުފާނުގެ ޒައާމަތުގައި ސްޓޭޓް މިނިސްޓަރުންނާ، ޑެޕިޔުޓީ މިނިސްޓަރުންގެ މުސާރައިން އުނިކުރުމަށް އަންގަވާ އެކަން ވެސް ކުރެއްވެވިއެވެ. އެހެންކަމުން އެއީ ހަމަ އެކަނި ރައީސް މުއިއްޒު ކުރެއްވި ކަމެއް ނޫންކަން ހާމަވެގެންދެއެވެ.