މޫސުން ގޯސްވުމުގެ ސަބަބުން ބާއްވަން އުޅުނު "އުއްމަތް ފަލަސްތީނާއެކު" އިވެންޓްތައް މިއަދާއި މިރޭ ބާއްވާ ގޮތަށް ހަމަޖެހިއްޖެއެވެ.

މި ހަރަކާތްތަކަކީ ޔޫތް ފޯ ޔުނިޓީ ނަމުގައި ޒުވާނުން ހިންގަމުން އަންނަ ޖަމިއްޔާއަކުން އިސްނަގައިގެން ކުރިއަށް ގެންދާ ހަރަކާތްތަކެކެވެ.

މި ޖަމިއްޔާގެ އިތުރުން، ރައިޓް މޫވްމަންޓް، ބްލަޑް ޑޮނާސް، ކޭކް ޑޯނަރސް، ޝީލްޑް ހުޅުމާލެ ސްޕޯޓްސް ކްލަބް އަދި ދުވާފަރު އިސްލާމިކް މޫވްމަންޓް ބައިވެރިވާ ކަމަށް މައުލޫމާތު ހިއްސާ ކޮށްފައިވެއެވެ.

މި އިވެންޓް އަކީ ސަހްޔޫނީން ފަލަސްތީނައި ދެކޮޅަށް ހިންގަމުންދާ ގަތުލުއާންމު އަށް އަހަރެއް ވުމާއި ގުޅިގެން ބޭއްވުމަށް ހަމަޖެހުނު ބޮޑު އިވެންޓެކެވެ. މީގެ އިތުރުން މި އިވެންޓްތަކުގެ މަގުސަދަކީ ފަލަސްތީނުގެ މުސްލިމުންނަށް ދިވެހިންގެ ހިތުގައި އޮތް ލޯބި ދައްކުވައިދީ، އެހީތެރިކަން ފޯރުކޮށްދީ އަދި އެ މީހުންނާއި އެކުގައި ތިބި ކަން ދައްކުވައިދިނުމަށް ބާއްވާ ހަރަކާތްތަކެއް ކަމަށް އެ ޖަމިއްޔާ އިން މައުލޫމާތުދެއެވެ.

މިގޮތުން މައިގަނޑު ތިން ބަޔަކަށް މި އިވެންޓް ވަނީ ބަހާލާފައެވެ. އެއީ ހުކުރު ދުވަހުގެ ހަވީރު 4:15 އިން 6:00 އަށް ބާއްވާ އާއިލީ ހަވީރަކާއި، މިރޭ ސޯޝަލް ސެންޓަރުން ފެށިގެން އާޓިފިޝިއަލް ބީޗާއި ހަމައަށް ކުރިއަށްދާ ބޮޑު ހިނގާލުމެއްެގެ އިތުރުން އިވެންޓްތައް ނިންމާލުމަށް އާޓިފިޝަލް ބީޗް ސަރަހައްދުގައި ބާއްވާ އެއްވުމެކެވެ.

މި އިވެންޓްތަކުގައި ވީހާވެސް ގިނަ އަދަދެއްގެ ފަރާތްތަކުން ބައިވެރިވުމަކީ މި ޖަމިއްޔާގެ ވަރަށް ބޮޑު އެދުމެއް ކަމަށް ވަނީ ފާހަގަކޮށްފައެވެ.