ރައީސް ޑރ. މުހައްމަދު މުއިއްޒަކީ ލިބެންވާ އެންމެ ލާރި ފޮއްޗެއްވެސް ދޫކޮށްލައްވާނެ ބޭފުޅެއް ނޫންކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.

ރައީސް ޔާމީން މިފަދައިން ވިދާޅުވެފައި ވަނީ ބުރާސްފަތި ދުވަހުގެ ރޭ ފްރޮންޓް އޮފީހުގައި އޮތް ޖަލްސާގައި ވާހަކަދައްކަވަމުންނެވެ.

މުއިއްޒު ވެރިކަމަށް ވަޑައިގެން ފުރަތަމަ ދުވަސްކޮޅު މުލީއާގޭގެ އާބާތުރަ ފިލުވަން ހޭދަވި މުއްދަތުގައި އެމަނިކުފާނު ހުންނެވީ އަމިއްލަފުޅު ގެކޮޅު ދިމްޔާތުގައި ކަމަށާއި އެ މުއްދަތުގައި ދިމްޔާތަށް ސަރުކާރުން ކުލި ނެންގެވި ކަމަށް ރައީސް ޔާމީން ވިދާޅުވިއެވެ.

މި ސަރުކާރުގެ ކުރީކޮޅު ކޮންމެ ދުވަހަކު ދުވާލަކު ތިން ލައްކަ ރުފިޔާ ރައީސް އޮފީހުގެ ފަރީއްކުޅަށް ވަނީ ޚަރަދު ކޮށްފައިކަމަށާއި މިކަމުން ވެސް ދޭހަވަނީ ރައީސް މުއިއްޒަކީ ލިބޭ ފައިސާ ފޮއްޗެއް ދޫކޮށްނުލާނެ މީހެއް ކަމަށް ވިދާޅުވެ ރައީސް ޔާމީން ވަނީ ފާޑުވިދާޅުވެފައެވެ.

މާލީ ހާލަތު ގޯސްކަމަށްބުނެ، ޚަރަދު ކުޑަކުރުމުގެ ނަމުގައި ރައީސް ޑރ.މުހައްމަދު މުއިއްޒު ވަނީ ދެ އަހަރު ވަންދެން އެމަނިކުފާނުގެ މުސާރައިގެ 50 އިންސައްތަ ނުނަންގަވަން ނިންމަވާފައެވެ. އަދި ދައުލަތުގެ ސިޔާސީ މަގާމުތަކުގައި ތިބި ފަރާތްތަކުގެ ވެސް މުސާރައިން 10 އިންސައްތަ ކަނޑާލުމަށް ވެސް ވަނީ ނިންމަވާފައެވެ. މިއާއެކު އަދުރޭ ވަނީ އޭނާގެ މުސާރާއިން ވެސް 50 އިންސައްތަ ނުނަންގަވާނެކަމަށް އިއުލާން ކުރައްވާފައެވެ.

މި ވާހަކަތަކަަށް އިޝާރަތް ކުރައްވާ ރައީސް ޔާމީން ވިދާޅުވީ އަދުރޭ އަދި މުއިއްޒު ކުރައްވައިގެން އުޅުއްވަނީ މާ މޮޅުކަމެއް ނޫންކަމަށެވެ. މިއީ ދެއްކުންތެރިކަމަށް ކުރިކަމެއްކަމަށާއި އެމީހުންގެ މުސާރައިން އެއްބައި ނުނެގިޔަސް އެ ދެމީހުންނަަށް ވާނެ ގެއްލުމެއް ނޯންނާނެކަމަށް ވިދާޅުވެ ރައީސް ޔާމީން ވަނީ އެ ނިންމެވުމަށް ފާޑު ވިދާޅުވެފައެވެ.