ސަހްޔޫނީންގެ ޕާސްޕޯޓް ވަގުތުން ތަންފީޒުކުރުމުގެ ބާރު ރައީސުލްޖުމްހޫރިއްޔާ ޑރ މުހައްމަދު މުއިއްޒަށް އޮތް ނަމަވެސް، މި ބިލް ފާސްނުކޮށް މަޖިލީހުގެ ޚާރިޖީ ގުޅުންތަކުގެ ކޮމިޓީގައި ބާއްވާފައި އޮންނަތާ 138 ދުވަސް ވެއްޖެއެވެ.

މިދިޔަ އަހަރުގެ އޮކްޓޯބަރު މަހުގެ 07 ވަނަ ދުވަހު ފެށިގެން ދިޔަ ގަތުލުއާންމު އަށް އަހަރެއް ވެގެން ދިޔަ އިރުވެސް ސަހްޔޫނީންގެ ޕާސްޕޯޓް މަނާކުރުމުގެ ފިޔަވަޅު އެޅުމަށް ސަރުކާރުން ވަނީ ނުކުޅެދިފައެވެ.

ބައިނަލްއަގްވާމީ އެކި ޕްލެޓްފޯމްތަކުގައި ފަލަސްތީނާއި ދެކޮޅަށް ސަހްޔޫނީން ކުރަމުންދާ ހަނގުރާމަ ކުއްވެރިކުރުން ފިޔަވާ އިތުރު ފިޔަވަޅެއް އަޅާ މަންޒަރެއް މިހާތަނަށް ފެނިފައިނުވެއެވެ.

މަޖިލީހުގެ ފުރަތަމަ ދައުރު ނިމި ޗުއްޓީ އަށް ދިޔުމުން ސަހްޔޫނީންގެ ޕާސްޕޯޓް މަނާ ނުކުރެވުނީ ކަމަށް ވިދާޅުވެ ރައީސް އޮފީހުގެ އިސް ތަރުޖަމާނު ހީނާ ވަލީދު ވަނީ ބަހަނާ ދައްކަވާފައެވެ.

އެހެން ނަމަވެސް މަޖިލިސް ޗުއްޓީގައި އޮއްވާ ދައުރުން ބޭރު ދެ ޖަލްސާއެއް ވަނީ ބާއްވާފައެވެ. އެއީ ޕްރޮސެކިޔުޓާ ޖެނެރަލެއް ހޮވަން ބޭއްވި ޖަލްސާއަކާ ކުންފުނިތަކުގެ ގާނޫނަށް އިސްލާހް ގެންނަން ބޭއްވި ޖަލްސާއެކެވެ. އެހެން ނަމަވެސް ސަހްޔޫނީންގެ ޕާސްޕޯޓް މަނާ ކުރުމަށް ޖަލްސާއެއް ބާއްވާފައި ނުވެއެވެ.

މަޖިލިސް ޗުއްޓީއަށްފަހު ފެށިގެން 7 ޖަލްސާއެއް ބާއްވާފައިވާއިރު މިހާތަނަށް ވެސް އެ މަސައްކަތެއް ކުރައްވާފައި ނުވެއެވެ.

ސަހްޔޫނީންގެ ޕާސްޕޯޓް މަނާނުކޮށް ލަސްވާތީ، އެމްޑީޕީގެ ފަރާތުން މަޖިލީހަށް ހުށަހެޅި ކުއްލި މައްސަލަ މަޖިލީހުގެ ރިޔާސަތުގައި އިންނަވާ މަޖިލިސް ރައީސް އަބްދުއްރަހީމް ވަނީ ބޭރުކޮށްލާފައެވެ.

ފަލަސްތީނުގެ ހައްގުގައި ތިބި ކަމަށް ބުނާ ސަރުކާރުން އަންނަނީ ސަހްޔޫނީންގެ ޕާސްޕޯޓް މަނާ ނުކޮށް ބަހަނާއަކަށްފަހު ބަހަނާއެއް ދައްކަމުންނެވެ.