ފަލަސްތީނަށް ދިވެހިންގެ ހިތުގައި އޮތް ލޯތްބާއި ކުލުނު އަދި ފަލަސްތީނުގެ ރައްޔިތުންނަށް އެހީތެރިކަން ފޯރުކޮށްދިނުމުގެ މަގްސަދުގައި ދިވެހި ޒުވާނުންގެ ޖަމިއްޔާއަކުން އިއްޔެ ކުރިއަށް ގެންދިޔަ ހަރަކާތްތަކަށް އާންމުންގެ ބޮޑު ތަރުހީބެއް ލިބިގެން ގޮސްފިއެވެ.

ތިން ބަޔަކަށް ބަހާލައިގެން ކުރިއަށްދިޔަ މި އިވެންޓްގައި ގިނަ އަދަދެއްގެ އާންމުންގެ އިތުރުން، ސިޔާސީ މަޝްހޫރު ފަރާތްތަކާއި ގިނަ އިލްމުވެރިން ވަނީ ބައިވެރިވެފައެވެ.

މިދިޔަ އަހަރުގެ އޮކްޓޫބަރު މަހުގެ 07 ވަނަ ދުވަހު ފަލަސްތީނާއި ދެކޮޅަށް ސަހްޔޫނީން ކުރިއަށް ގެންދާ ހަނގުރާމައިގެ ސަބަބުން ފަލަސްތީނަށް އެކި ގޮތްގޮތުން އެހީތެރިވުމަށް ދިވެހިން އަންނަނީ ހުއްޓުމެއްނެތި މަސައްކަތް ކުރަމުންނެވެ.

ދިވެހިން ފަލަސްތީނަށްޓަކައި އޮތް ލޯބި ދައްކަމުން ދާއިރު، ދިވެހި ސަރުކާރުން ހަނު ތިބެ، ސަހްޔޫނީންގެ ޕާސްޕޯޓް މަނާކުރުން ފަސްކުރަމުންދާތީ ސަރުކާރަށް ފާޑުކިޔުން އަންނަނީ އަމާޒުވަމުންނެވެ.

މީގެ އިތުރުން، މިފަދަ ހަރަކާތްތަކަށް ސަރުކާރުގެ ފަރާތުން އެއްވެސް އެހީތެރިކަމެއް ނުލިބޭ ތަނުގައި މިފަދަ އިވެންޓްތަކަށް ސަރުކާރުގެ ފަރާތްތަކުގެ ބައިވެރިވުން މަދުކަން ފާހަގަކުރެވެއެވެ.