ސަރުކާރު ހިންގާ މައި ޕާޓީ "ޕީޕަލްސް ނެޝަނަލް ކޮންގްރެސް" (ޕީއެންސީ)އަށް 1000 ފޯމް، ބާރަށު ދާއިރާގެ މެމްބަރު އިބްރާހިމް ޝުޖާއު ހޯދާފައި ވަނީ ރިޝްވަތު ދީގެންކަން ހާމަވެއްޖެ އެވެ.

"ތޭރަ އޮންލައިން" އަށް މައުލޫމާތު ދިން ޕީއެންސީގެ އިސް ބޭފުޅަކު ވިދާޅުވީ، ޕީއެންސީއަށް މެމްބަރުން ގިނަ ކުރުމަށް އެ ޕާޓީން ކުރަމުންދާ މަސައްކަތުގައި އެ ޕާޓީން ވަނީ ވުޒާރާތަކަށާއި، ކުންފުނިތަކަށާ މަޖިލިސް މެމްބަރުންނަށް 1000އަށްވުރެ ގިނަ ފޯމް ހޯދުމަށް އަންގާފައިކަމަށެވެ.

އެގޮތުން ބާރަށު ދާއިރާގެ މެމްބަރު ޝުޖާއު ވެސް ވަނީ އެ ޕާޓީއަށް 1000 ފޯމް ހަވާލުކޮށްފައެވެ. 'ތޭރަ އޮންލައިން' އަށް މައުލޫމާތު ލިބުނުގޮތުގައި ޝުޖާއު 1000 ފޯމް ހަމަކޮށްފައި ވަނީ އޭނާގެ ދާއިރާގެ ޒުވާނުންނަށް ރިޝްވަތުގެ ގޮތުގައި ފައިސާ އާއި ވަޒީފާތައް ދީގެންނެވެ.

އެގޮތުން އެ ދާއިރާއަށް ނިސްބަތްވާ ޒުވާނަކު ބުނީ ޝުޖާއު މިކަން ކޮށްފައި ވަނީ "ނޮވެލް"އަށް ކޮފީތަކަށް ގެންގޮސް ސަރުކާރުގެ ސިޔާސީ މަގާމްތައް ދޭނަމޭ ކިޔާފައެވެ. އަދި ފޯމް ފުރުވާފަ، އެ ޒުވާނުން ވަޒީފާ ހޯދަން ގުޅުމުން ފަހުން ފޯނު ނުނަގައިގެން އެމީހުން ރުޅިި ގަދަވެގެން ޝުޖާއު އަށް އެއްޗެހި ކިޔަން ފެށުމުން އޭނާ ވަނީ އެމީހުންނާ ބައްދަލުކޮށް ފައިސާ ދީފައެވެ. އެ ޒުވާނާ ބުނިގޮތުގައި ޝުޖާއު ވަނީ ކޮންމެ މީހަކަށް 10،000 ރުފިޔާ ދީފައެވެ. އަދި ވަޒީފާ ކަންތައްތައް ވީހާވެސް އަވަހަށް ކޮށްދެއްވާނެކަމަށް ވެސް އޭނާ ވިދާޅުވިކަމަށް އެ ޒުވާނާ ބުންޏެވެ.

މާލީ ހާލަތު ދަށްވެފައި މިވާ ހާލަތުގައި ޕީއެންސީއަށް ނިސްބަތްވާ މެމްބަރު ޝުޖާއު އަންނަނީ ސިޔާސީ މަގާމްތައް ދޭނެކަމަށް ބުނެ ދާއިރާގެ ޒުވާނުން މޮޔަ ހައްދަމުންނެވެ.