ސަހްޔޫނީންގެ ޕާސްޕޯޓް މަނާކުރަން ބޭނުން ނުވާ އެއް މެމްބަރަކީ ޕީއެންސީ ޕީޖީ ގްރޫޕްގެ ލީޑަރ އަދި އިނގުރައިދޫ ދާއިރާގެ މެމްބަރު އިބްރާހިމް ފަލާހްކަން އެނގިއްޖެ އެވެ.

"ތޭރަ އޮންލައިން" އަށް މައުލޫމާތު ލިބުނުގޮތުގައި ސަހްޔޫނީންގެ ޕާސްޕޯޓް މަނާ ކުރަން ބޭނުން ނުވާ އެއް މެމްބަރަކީ ފަލާހެވެ. އޭނާ ވަނީ މަޖިލީހުގެ ސަރުކާރަށް ނިސްބަތްވާ އެހެން މެމްބަރުންނަށް ވެސް އެކަން ކުރުމުގައި އެއްބާރުލުން ނުދިނުމަށް އަންގާފައެވެ.

ނަން ހާމަ ނުކުރުމަށް ޝަރުތުކޮށް "ތޭރަ އޮންލައިން" އަށް މައުލޫމާތު ދިން ޕީއެންސީގެ މަޖިލިސް މެމްބަރަކު ވިދާޅުވީ ފަލާހް އެކަމާ ދެކޮޅަށް ވާހަކަ ދައްކަވާފައި ވަނީ ރާއްޖެ އަންނަ ފަތުރުވެރިން މަދުވެދާނެކަމަށް ބުނެއެވެ.

"ސަހްޔޫނީން ވިޔަސް މި ދުވަސްކޮޅު ރާއްޖެ އަންނަ މީހުން މުހިންމު ވާނެކަމަށް ބުނި. އެކަން ކޮށްފިއްޔާ ދެން މި ލިބޭ މަދު ފައިސާކޮޅު ވެސް ނުލިބިދާނެތީ ރައީސް ވިދާޅުވީ މަޖިލިހުން އެ މަސައްކަތް ލަސްކުރަން ފަލާހަށް" އެ މެމްބަރު ވިދާޅުވިއެވެ.

މެއި 28، ގައި ބޭއްވި ނޫސްވެރިންގެ ބައްދަލުވުމުގައި ސަހްޔޫނީންގެ ޕާސްޕޯޓާ ގުޅޭގޮތުން ނޫސްވެރިން ތަކުރާރުކޮށް ސުވާލުކުރި އެވެ. އެ ސުވާލުތަކަށް ފުރަތަމަ ޖަވާބު ދެއްވަމުން ފަލާހު ވިދާޅުވީ، މައްސަލާގެ މާބޮޑު މައުލޫމާތެއް އެނގިފައި ނެތުމުން ޖަވާބެއް ދެވެން ނެތް ކަމަށެވެ. ނަމަވެސް ފަހުން އެ ސުވާލަށް ޖަވާބު ދެއްވަމުން އޭނާ ވިދާޅުވީ އެއީ ފޮރިން ދެ ގައުމެއްގެ ދޭތެރޭ ހިނގާ، މައްސަލަތަކެއްކަމަށެވެ.

މިކަމާ ގުޅިގެން ގިނަ ބަޔަކު ވަނީ ފަލާހަށް ވަރަށް ބޮޑަށް ފާޑުވެސް ވިދާޅުވެފައެވެ.