ސަރުކާރު ހިންގާ ޕާޓީ ޕީޕަލްސް ނެޝަނަލް ކޮންގްރެސް (ޕީއެންސީ) އިން މީހުންގެ ޣައިރު ހާޒިރުގައި ސޮއި ފޯޖްކޮށްގެން ޕާޓީއަށް ފޯމް ފުރާކަން ހާމަވެއްޖެ އެވެ.

ޕީއެންސީއަށް މެންބަރުން އިތުރު ކުރުމަށް އެ ޕާޓީން މިދުވަސްވަރު ޕީއެންސީގެ ބައެއް ފަރާތްތަކުން މީހުންގެ ސޮއި ފޯޖްކޮށް ފޯމް ފުރަމުންދާކަމަށް ބުން ސޯޝަލް މީޑިއާގައި ފާޑުކިޔުން ވަނީ އަމާޒުވެފަ އެވެ.

އެގޮތުން މީހަކު އެކްސްގައި ފޮޓޯ ތަކަކާއެކު ހިއްސާކޮށްފައިވާ ޕޯސްޓެއްގައި ސަރުކާރުގެ ސިޔާސީ މަގާމުތަކުގައި ތިބި ބައެއް މީހުނާއި ޕާޓީގެ ބައެއް ފަރާތްތަކުން ލިސްޓްތަކެއް ހިފައިގެން ތިބެ ފޯމް ފުރުމުގެ މަސައްކަތް ކުރާތަން ފެނެ އެވެ.

މައުލޫމާތު ލިބުނުގޮތުގައި އެކަން ކުރަމުން ދަނީ ޕީޕީއެމްގެ ގިނަ މެންބަރުން ޕާޓީ ބަދަލުކުރަން ދެކޮޅު ހަދަމުން ދިޔުމާއެކު، ޕީއެންސީއަށް ބޭނުންވާ އަދަދަށް ފޯމް ހަމަކުރުމަށް ގޮންޖެހުންތަކާއި ކުރިމަތިވެފައިވާތީއެވެ.

އިއްޔެގެ ވަގުތެއްގައި އިބްރާހިމް ފަލާހު ވިދާޅުވެފައިވަނީ މިހާރު ޕީއެންސީއަށް 65،000 ފޯމް ހަމަވެފައިވާ ކަމަށެވެ.

ނަމަވެސް މި ފޯމްތަކަކީ ސައްހަ ފޯމްތަކެއް ނޫންކަމަށްބުނެ ގިނަ ބަޔަކު އަންނަނީ މީސްމީޑިޔާގައި ފާޑުކިޔަމުންނެވެ.