ޕާކިންގ މައްސަލަ އަށް ހައްލު ހޯދައިދިނުމުގެ ބަދަލުގައި ވެހިކަލްތައް ޓޯކޮށް، ޖޫރިމަނާކޮށް ސަރުކާރުން ދަނީ ދައުލަތަށް ނުހައްގު ފައިސާ ނަގަމުންދާއިރު މިއިން އެއްވެސް މައްސަލައަކަށް މިފައިސާ ޚަރަދުކުރަމުންދާ ތަނެއް ނުފެނެއެވެ.

މަގުމަތީގައި ދުއްވާ އެއްޗެއްސަށާއި ހިނގާ ބިނގާވެ އުޅޭ މީހުންނަށް އުނދަގޫވާނެހެން ބަހައްޓާފައި ހުންނަ ވެހިކަލްތައް ނެގުމަށް ފުލުހުން ފަށާފައިވާ މަސައްކަތުގެ ތެރެއިން މިހާތަނަށް އެތައް ވެހިކަލެއް ނަގާފައިވެއެވެ.

ނަމަވެސް ވިސްނާލަންޖެހޭ ކަމަކީ ގަވާއިދާއި ޚިލާފަށޭ ކިޔާ ޓޯ ކުރުމުގެ ބަދަލުގައި މިފަދަ އުޅަނދުތައް ގަވާއިދަށ ފައްތާ އަދި އެ އުޅަނދުތައް ޕާކު ކުރާނެ ތަނެއް ސަރުކާރުން ހަމަޖައްސަދޭން މަސައްކަތް ކުރަންޖެހޭ ކަމެވެ.

އޭގެ ބަދަލުގައި ފެނިގެން މިދަނީ ބޮޑު އަގުގައި ރައްޔިތުން ޖޫރިމަނާ ދެއްކުމުންވެސް އުޅަނދުތައް ދޫނުކޮށް އެކި ކަހަލަ ގެއްލުންތައް މިފަދަ އުޅަނދުތަކަށް ލިބެމުންދާ ތަނެވެ.

ހަގީގަތަކީ ބޮޑު އަގު ސަރުކާރަށް އަދާކުރުމަށްފަހު އެތެރެކުރާ އުޅަނދުތައް ޕާކް ކުރެވޭނެ ނިޒާމެއް ސަރުކާރުން ހަމަޖައްސަން ޖެހޭނެކަމެވެ. އެފަދަ ގާބިލުކަމެއް ނެތްނަމަ ނަހަމަ ގޮތުގައި ރައްޔިތުންގެ ފައިސާ ނެގުން ހުއްޓާލަން އެބަޖެހެއެވެ.

މި ވެރިކަމަކީ އަބަދުވެސް ކުރީ ސަރުކާރުތަކުގެ ބޮލަށް ކަންކަން ޖަހަމުންދާ ވެރިކަމަކަށް ވާއިރު ވެހިކަލްތައް ކުށްވެރިކޮށް ރައްޔިތުންނަށް އުނދަގޫވާ ގޮތަށް ސިޔާސަތުތައް ބެހެއްޓުމަކީ މި ސަރުކާރުގެ އާދައެކެވެ. މިފަދަ ކަންތައްތަކުން ހާމަވެގެން ދަނީ ސަރުކާރުގެ ނުކުޅެދުންތެރިކަމާއި ނާގާބިލުކަމެވެ.

"ގަވާއިދާއި ޚިލާފަށް" ޕާކް ކޮށްފައި ހުންނަ އުޅަނދުތައް ދައުލަތަށް ނަގަމުންދާ މައްސަލައިގައި ޒުވާނުންތައް ވަނީ ސަރުކާރާއި ދެކޮޅަށް އިހުތިޖާޖުތައްވެސް ކުރިއަށް ގެންގޮސްފައެވެ.

ޒުވާނުންގެ ބޮޑު ތާއީދާއިއެކު ވެރިކަމަށް އައިސް އެންމެ ފަހުން ޒުވާނުންގެ ކުރިމަގު އަދި އުއްމީދުތަކުގައި ކޮޅު ފައިން ޖަހާ މި ސަރުކާރު މިވަނީ އަމިއްލައަށް އިސްތިއުފާ ދެއްވަން ޖެހޭ ވަރަށް ގައުމުގެ ކަންކަން ގެންގޮސްފައެވެ.