ސިޔާސީ މަގާމްތަކަށް މީހުން ނުނަގާނެކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކިތަންމެ ފަހަރަކު ވިދާޅުވި ނަމަވެސް ވައުދާ ހިލާފުވެ، މިނިސްޓްރީ އޮފް ދިވެހި ލެންގުއޭޖް ކަލްޗާ އެންޑް ހެރިޓޭޖަށް ޑެޕިއުޓީ މިނިސްޓަރަކާއި ޕޮލިޓިކަލް ޑިރެކްޓަރެއް އައްޔަންކުރިކަން ހާމަވެއްޖެ އެވެ.

ސަރުކާރު ޖަވާބުދާރީ ކުރުމަށް މަސައްކަތް ކުރާ އޮންލައިން ނޫހެއް ކަމަށްވާ "އަދަދު" ނޫހުން ވަނީ ޚަބަރެއް ޝާއިއުކޮށްފައެވެ. އެގޮތުން އެ ޚަބަރުގައިވާގޮތުން އެ މިނިސްޓްރީގެ ޑެޕިއުޓީ މިނިސްޓަރަކަށް އައްޔަނުކުރީ ކުރިން ޓީޗަރަކަށް މަސައްކަތް ކުރި ށ. ފޯކައިދޫ، ދޫވެހި އިބްރާހިމް ރަޝީދު އިދުރީސް އެވެ. އަދި ޕޮލިޓިކަލް ޑިރެކްޓަރަކަށް އައްޔަނު ކުރީ ކުރީގެ މަޝްހޫރު ލަވަ ކިޔުންތެރިޔާ ދަފްތަރު، ނަންބަރު ރސ 7771، މާލެ، މުމްތާޒް މޫސާ އެވެ.

އެ މީހުން އައްޔަންކޮށްފައި ވަނީ މިދިޔަ ހަފްތާ ތެރޭގައެވެ. އަދި އެ ދެ މީހުން ވެސް މިހާރު ވަނީ ވަޒީފާއަށް ނިކުންނަން ފަށާފައެވެ.

ދައުލަތުގެ ހަރަދުތައް ކުޑަކޮށް ސިޔާސީ މުވައްޒަފުންގެ އަދަދު މަދު ކުރުމުގެ އިތުރުން ސިޔާސީ މުވައްޒަފުންގެ މުސާރައިން 10 ޕަސަންޓު އުނި ކުރަން ރައީސް މުއިއްްޒު ނިންމެވި ނަމަވެސް ފެނިގެން ދަނީ އަދިވެސް ސިޔާސީ މުވައްޒަފުން އައްޔަން ކުރުން ހުއްޓާ ނުލާ މަންޒަރެވެ.

ރައީސް މުއިއްޒު ވެރިކަމަށް އައީ ސިޔާސީ މަގާމްތަކުގެ އަދަދު 700އަށްވުރެ ގިނަ ނުކުރާނެކަމުގެ ވައުދާއެކުގައެވެ. އެހެން ނަމަވެސް މި އަދަދު ވަނީ ފަހަނާއަޅާ ގޮސްފައެވެ. މި ސަރުކާރުގައި ތިބި ސިޔާސީ މުވައްޒަފުންގެ އަދަދުވެސް މި ސަރުކާރުން ހާމަކޮށްފައި ނުވެއެވެ.