މޯލްޑިވްސް އެއާޕޯޓްސް ކޮމްޕެނީގެ ބޯޑުން އިބްރާހީމް ނޫރައްދީން ވަކިކޮށްފައިވާ ކަމަށް އެ ކުންފުނިން ހާމަކޮށްފިއެވެ.

2019 ވަނަ އަހަރުން ފެށިގެން އެމްއޭސީއެލްގެ ބޯޑުގެ މެންބަރެއްގެ ގޮތުގައި އިންނަވާ ނޫރައްދީން ވަކިކޮށްފައިވަނީ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުންނެވެ.

އެންމެ ފަހުން 2019 ވަނަ އަހަރު އެމްއޭސީއެލްގެ ބޯޑަށް އައްޔަން ކުރުމުގެ ކުރިން 2005 ވަނަ އަހަރުން ފެށިގެން 2008 ވަނަ އަހަރާ ހަމައަށް، ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ވެސް އެއާޕޯޓު ކޮމްޕެނީގެ ބޯޑުގައި ނޫރައްދީން އިންނެވި އެވެ. އަދި ކުރީގެ ރައީސް މުހައްމަދު ނަޝީދުގެ ވެރިކަމުގައި 2008 ވަނަ އަހަރުން 2010 ވަނަ އަހަރާ ހަމައަށް އެ ބޯޑުގެ ޗެއާމަނަކަށް ވެސް އިންނެވި އެވެ.

މީގެ އިތުރުން، ކްރައުން އެންޑް ޗަމްޕާ ރިސޯޓްސްގެ ވެސް ޑިރެކްޓަރެކެވެ. ކްރައުންގެ ދަށުން ހިންގާ ޓްރީ ޓޮޕް ހޮސްޕިޓަލުގެ ބޯޑުގައި ވެސް ނޫރައްދީން އިންނަވަ އެވެ. އަދި މޯލްޑިވްސް އެސޯސިއޭޝަން އޮފް ޓުއަރިޒަމް އިންޑަސްޓްރީ ނުވަތަ މަޓީގެ ބޯޑުގައި ވެސް ނޫރައްދީން މަސައްކަތް ކުރައްވަ އެވެ.

ނޫރައްދީނަކީ އައްޑޫ އިންޓަނޭޝަނަލް އެއާޕޯޓް ޕްރައިވެޓް ލިމިޓެޑުގެ ބޯޑު މެމްބަރެއް ވެސް މެ އެވެ.

ނޫރައްދީން މަގާމުން ވަކި ކުރެއްވީ ސީދާ ކޮން މައްސަލައެއް ނުވަތަ ވަކި ކުރި ސަބަބު އެމްއޭސީއެލް އަދި ޕީސީބީ އިން ހާމަކޮށްފައިނުވެއެވެ.