އަދުގެ ސަރުކާރުން ބޭނުންވަނީ މިނިވަން މުއައްސަސާއެއްކަމަށްވާ އެންޓި ކޮރަޕްޝަން ކޮމިޝަނަށް ނުފޫޒު ފޯރުވަންކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއީލް ނަސީމް ވިދާޅުވެއްޖެ އެވެ.

މީކާއިލް މިފަދައިން ވިދާޅުވެފައި ވަނީ އޭސީސީ އަދި އިލެކްޝަންސް ކޮމިޝަން (އީސީ) ގެ މައްޗަށް ސަރުކާރަށް ނުފޫޒު ފޯރުވޭ ގޮތަށް, އެ ދެ ކޮމިޝަނުގެ ރައީސް އާއި ނައިބު ރައީސް އައްޔަނު ކުރުމުގެ ބާރު ރައީސުލްޖުމްހޫރިއްޔާ ދިނުމަށް ގާނޫނު ބަދަލުކުރަން ސަރުކާރުން ހުށަހެޅި ބިލަށް ބަހުސްކުރައްވަމުންނެވެ.

މީކާއިލް ވިދާޅުވީ އޭސީސީން އެމީހުންނާ މަތިކޮށްފައިވާ ޒިންމާ އަދާނުކުރުމަކީ ރާއްޖޭގައި އެތައް ބައެއްގެ މަސައްކަތުން އުފެދިފައި އޮތް ޑިމޮކްރެޓިކް ނިޒާމަށް ގޮންޖަހަން ޖެހޭ ސަބަބެއް ނޫން ކަމަށެވެ.

ގައުމުގެ ރައީސް އައްޔަންކުރާ ރައީސުންނާއި ނައިބުންނަށް ނޫނީ ކޮމިޝަންތައް ނުހިންގޭނެ ކަމަށް ސަރުކާރުގެ މަޖިލިސް މެންބަރުން ދެކެނީ، ރައީސް އައްޔަންކުރާ މީހުންގެ ވިސްނުމަށް އާދަޔާ ހިލާފު ބަދަލެއް އަންނަނީތޯ ވެސް މީކާއިލް ވަނީ ސުވާލު އުފައްދަވާފަ އެވެ.

މީކާއިލް ވަނީ މި ބިލަށް ވަރަށް ބޮޑަށް ފާޑު ވިދާޅުވެފައެވެ.