ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން ތެރޭ ޕީޕަލްސް ނެޝަނަލް ކޮންގްރެސްގެ މެމްބަރޝިޕް ފޯމް ފުރިކަން ހާމަވެއްޖެ އެވެ.

"ތޭރަ އޮންލައިން" އަށް މައުލޫމާތު ލިބުނުގޮތުގައި މިކަން ކޮށްފައި ވަނީ އައިޑީ ކާޑް ޔުނިޓް ތެރޭގައެވެ. ދިވެހި ރައްޔިތުންގެ ޒާތީ މައުލޫމާތު ހޯދުމަށްފަހު އެތަނުގައި ތިބެ ފޯމް ފުރި މަންޒަރު ދައްކުވައިދޭ ފޮޓޯތަކެއް މީސްމީޑިޔާގައި ވަނީ ދައުރުވެސް ވެފައެވެ.

އައިޑީ ކާޑުތަކުގައިވާ މައުލޫމާތު ބޭނުންކޮށްގެން ފޯމްތައް ފުރުމަށްފަހު އެ ފަރާތްތަކުގެ ސޮއި ފޯޖް ވެސް ވަނީ ކޮށްފައެވެ. މިކަން "ތޭރަ އޮންލައިން"އަށް ޕީއެންސީގެ އިސްބޭފުޅެއް ވަނީ ކަށަވަރުވެސް ކޮށްދީފައެވެ.

ޕީއެންސީ މެމްބަރޝިޕް ޑްރައިވްގެ ނަމުގައި ސަރުކާރު ހިންގާ މައި ޕާޓީން ވަނީ ދައުލަތުގެ ވުޒާރާތަކާއި މުއައްސަސާތަކާ މުވައްޒަފުން އަދި މުދާ ނަހަމަ ގޮތުގައި ބޭނުންކޮށްފައެވެ. މިކަން މިގޮތައް ކޮށްފައި ޕީޖީ ގުރޫޕްގެ ލީޑަރ އިބްރާހިމް ފަލާހް ވިދާޅުވީ 10،000 ފޯމް ދެ ދުވަސްތެރޭ ލިބިފައިވާކަމަށެވެ.

ފަލާހްގެ މި ވާހަކަތަކާ ގުޅިގެން ގިނަ ބަޔަކު އަންނަނީ ޕީއެންސީއަށް ވަރަށް ބޮޑަށް ފާޑުކިޔުން އަމާޒުުކުރަމުންނެވެ.