ކ. ތުލުސްދޫގައި ރައްޔިތުންނާ މަޝްވަރާ ނުކޮށް ޓޫރިޒަމް ޒޯނެއް ކަނޑައެޅުމުން އެ ރަށު ކައުންސިލް އިދާރާގައި ރައްޔިތުން އިހުތިޖާޖްކޮށްފި އެވެ.

އެ ރަށުގެ ފުއްޓަށް ފަރާތާވީ ދިމާލުން ވަކި ބަޔަކަށް މަންފާވާގޮތަކަށް ޓޫރިޒަމް ޒޯނެއް ކަނޑައެޅާފައިވަނީ ތުލުސްދޫ ކައުންސިލްގައި ތިއްބެވި ސަރުކާރަށް ނިސްބަތްވާ ކައުންސިލަރުން ރައްޔިތުންނާ ބައްދަލު ކުރުމެއް ނެތިކަމަށް "ތޭރަ އޮންލައިން" އަށް އެ ރަށުން މައުލޫމާތު ދިން މީހަކު ވަނީ ބުނެފައެވެ.

މީސްމީޑިޔާގައި ދައުރުވަމުން އަންނަ ވީޑިޔޯ އިން ފެންނަ ގޮތުގައި ގިނަ އަދަދެއްގެ ރައްޔިތުން ވަނީ ތުލުސްދޫ ކައުންސިލް އިދާރާގެ ދޮރުމައްޗައް އެއްވެފައެވެ. އަދޮ އެގޮތައް "ޓޫރިޒަމް ޒޯނެއް" ކަނޑައަޅަން ޖެހޭނީ ރައްޔިތުންނާ މަޝްވަރާކޮށްގެންކަމަށް ވެސް އެ ފަރާތްތަކުން ވަނީ ގޮވާލާފައެވެ.

މިކަމާ ގުޅިގެން ކައުންސިލުން ބުނީ އެމީހުން ރައްޔިތުންނާ ބައްދަލުކޮށް މިކަމާ ގުޅިގެން މަޝްވަރާ ކުރިކަމަށެވެ.ނަމަވެސް މިކަން އެ ރަށު ރައްޔިތުން ވަނީ ދޮގުކޮށްފައެވެ.

ޓޫރިޒަމް ޒޯނު ކަނޑައެޅި އެ ސަރަހައްދުގެ ބޮޑު މިނަކީ ލަފާކުރެވޭގޮތުގައި 40،000 އަކަ ފޫޓެވެ. އެ ސަރަހައްދަކީ އެ ރަށު ރައްޔިތުން މޫދަށް އެރުމަށް ބޭނުން ކުރަމުން އައި ސަރަހައްދެއް ކަމަށާ އެގޮތައް ކުއްލިއަކަށް އެތަން ބަންދުކޮށް ހެދީމާ ރައްޔިތުން ތިބީ ކައުންސިލްގެ ނިންމުމާ ހިތްހަމަ ނުޖެހިފައެވެ.

އެ އިހުތިޖާޖްގައި އެ ރަށު ރައްޔިތުން ވަނީ ގޯތިތައް ދިނުމުގައި ލަސްވާކަމަށާއި އެކަން ވީއެންމެ އަވަހަކަށް ކުރަން ވެސް ގޮވާލާފައެވެ.