މިނިވަން މުއައްސަސާތައްކަމަށްވާ އިލެކްޝަން ކޮމިޝަން (އީސީ) އަދި އެންޓި ކޮރަޕްޝަން ކޮމިޝަންގެ ރައީސް އަދި ނައިބު ރައީސް އައްޔަން ކުރުމުގެ ބާރު ރައީސުލުޖުމްހޫރިއްޔާއަށް ދޭން ސަރުކާރުގެ މަޖިލިސް މެމްބަރުން ކުރި މަސައްކަތައް ފާޑުކިޔުން އަމާޒުވާން ފެށުމާއެކު ރައީސް ޑރ މުހައްމަދު މުއިއްޒު ޑިފެންސަށް ފައިބައިވަޑައިގެންފި އެވެ.

އީސީ އާއި އެންޓި ކޮރަޕްޝަން ކޮމިޝަން އޭސީސީގެ ވެރިން އައްޔަންކުރުމުގެ ބާރު ރައީސަށް ލިބިދޭ ގޮތަށް ސަރުކާރުން ގާނޫނަށް އިސްލާހު ހުށަހެޅީ އޮކްޓޯބަރު 27، ގަ އެވެ. އެ ބިލު ބަލައިގަނެ އަންގާރަ ދުވަހު ވަނީ މަޖިލީހުގައި ބަހުސްކޮށްފަ އެވެ.

މިކަމާ ގުޅިގެން ސަރުކާރަށް މީސްމީޑިޔާގައި އާންމުންގެ ގިނަ ބަޔަކު ވަނީ ފާޑުކިޔުން އަމާޒުކޮށްފައެވެ. އެގޮތުން އެކަން ކޮށްފި ނަމަ އެއީ ޑިމޮކްރަސީގައި ފަހަތައް އެޅޭ ފިޔަވަޅެއްކަމަށް ވެސް ގިނަ ފަރާތްތަކުން ވަނީ ބުނެފައެވެ.

ފާޑުކިޔުންތައް އަމާޒުވާން ފެށުމުން ރައީސް މުއިއްޒު ވަނީ އެ ފާޑުކިޔުންތަކަށް ރައްދު ދެއްވާ އެކްސްގައި ޕޯސްޓެއް ކުރައްވާފައެވެ.

އެގޮތުން އެ ޕޯސްޓްގައި އެމަނިކުފާނު ވިދާޅުވީ ދައުލަތުގެ ބާރުތަކާއި، މިނިވަން މުއައްސަސާއަތައް އަދި އިންތިހާބުކުރެވޭ ބަޔަކަށް އެމަނިކުފާނު މިހާތަނަށް ވެސް ނުފޫޒު ނުފޯރުވާ ކަމަށާއި ކުރިއަށް އޮތްތަނުގައި ވެސް ނުފޯރުވާނެ ކަމަށެވެ.

ނަމަވެސް އެތަންތަން އިސްލާހު ކުރަން ގާނޫނަށް ގެންނަން ޖެހޭ ކަމަށް ފެންނަ ބަދަލުތައް ސަރުކާރުން މަޖިލީހަށް ހުށަހަޅާނެ ކަމަށެވެ.

ރައީސް މުއިއްޒު މިފަދައިން ވިދާޅުވެފައި ވީ ނަމަވެސް މަޖިލީހުގައި މި ބިލަށް ބަހުސް ކުރައްވަމުން ވެރިކަންކުރާ ޕީއެންސީގެ ބައެއް މެންބަރުން ވަނީ ވަކިވެފައިވާ ތިން ބާރަށާއި މިނިވަން މުއައްސަސާތަކަށް ސީދާ ރައީސްގެ ބާރު އޮންނަން ޖެހޭނެ ކަމަށް ފާޅުގައި ވިދާޅުވެފަ އެވެ.