ދޮގު ހެދުމަކީ ފާފައެއްގެ ގޮތުގައި ރައީސް ޑރ މުހައްމަދު މުއިއްޒު ނުދެކޭކަމަށް ކުރީގެ ނައިބު ރައީސް ޑރ.މުހައްމަދު ޖަމީލް އަހުމަދު ވިދާޅުވެއްޖެ އެވެ.

ޑރ. ޖަމީލް މިފަދައިން ވިދާޅުވެފައި ވަނީ އެކްސްގައި ކުރެއްވި ޕޯސްޓެއްގައެވެ.

އެގޮތުން ޑރ ޖަމީލް ވިދާޅުވީ ދޮގު ހެދުމަކީ ފާފައެއް ކަމަށް ރައީސް މުއިއްޒު ނުދެކޭކަމަށެވެ.ރައީސް މުއިއްޒުގެ ތަރުބިއްޔަތު ގޯސްކަމަށާއި އެމަނިކުފާނުގެ އަޚްލާގެއް ނެތްކަމަށް ވެސް ޑރ ޖަމީލް ވަނީ ވިދާޅުވެފައެވެ.

ރައީސް މުއިއްޒު ވެރިކަން ޖަހައިގަތީ ރައީސް އަބްދުﷲ ޔާމީން އަބްދުލްގައްޔޫމްގެ ޝަރީޢަތަކީ ސިޔާސީ ކަމެކޭ ކިޔައި ހަޅޭއްލަވަމުންކަމަށް ވިދާޅުވެ ޑރ. ޖަމީލް ވަނީ ރައީސް މުއިއްޒަށް ފާޑުކިޔުން އަމާޒުކުރައްވާފަ އެވެ.

ރައީސް މުއިއްޒު ވެރިކަން ހޯދަން ރައީސް ޔާމީންގެ ހުސް ގޮނޑި ވިއްކިކަމަށާ އޭރު ރިޔާސީ އިންތިޚާބްެގެ ކެމްޕެއިން ދުވަސްވަރު ރައްޔިތުންނަށްވި ބޮޑެތި ވައުދުތައް ވީ މުޅިން ދޮގަށްކަމަށް ވެސް ޑރ ޖަމީލް ވަނީ ޕޯސްޓްގައި ފާހަގަކުރައްވާފައެވެ.

ރައީސް ޔާމީނަށް ހެޔޮކަމުގެ ބަދަލުގައި ރައީސް މުއިއްޒު ދިނީ ލަނޑެއްކަމުން ވެސް ދޭހަވަނީ ރައީސް މުއިއްޒަކީ އަހުލާގެއް ނެތް ނުބައި ބެލެނިވެރިކަމުގެ ހެއްކެއްކަމަށް ވެސް ޑރ. ޖަމީލް ވިދާޅުވި އެވެ.