ރާއްޖޭގެ އުތުރުން ރާއްޖޭގެ ހާއްސަ އިގްތިސާދީ ސަރަހައްދު، ކޯސްޓްގާޑް ޝިޕް ޝަހީދު އަލީ ދަނީ ޕެޓްރޯލްކޮށް ބަލަހައްޓަމުން ކަމަށް މޯލްޑިވްސް ނެޝަނަލް ޑިފެންސް ފޯސް އިން ބުނެފިއެވެ.

އެމްއެންޑީއެފުން އެކްސްގައި ކުރި ޕޯސްޓެއްގައި ވިދާޅުވެފައިވަނީ ރާއްޖޭގެ އުތުރުން އިޤްތިސާދީ ސަރަހައްދުގައި ކޯސްޓްގާޑް ޝިޕް ޝަހީދުއަލީ ޕެޓްރޯލްކޮށް ސެކިއުރިޓީ ބަލަހައްޓަމުން ގެންދާ ކަމަށެވެ.

ރާއްޖޭގެ އުތުރުން ރާއްޖޭގެ ހާއްސަ އިގްތިސާދީ ސަރަހައްދު ޕެޓްރޯލްކޮށް ބަލަހައްޓަމުންދާ ކަމަށް ސިފައިން ބުނެފައި މިވަނީ އެ ސަރަހައްދު ގައި މަސްވެރިކަން ކުރަން އުޅުނު ތިން ދޯންޏަކަށް އިންޑިއާގެ ދެ މަނަވަރެއް ގައި ތިބި ސިފައިން ހަތިޔާރާ އެކު އަރާ ދިވެހީންނާއި ސުވާލުކޮށްފައި ވަނިކޮށެވެ. އެކަމާއި ގުޅިގެން މަސްވެރީން ވަނީ ކަންބޮޑުވުން ފާޅުކޮށްފައެވެ.

އިންޑިއާ ސިފައިންގެ ފަރާތުން މިފަދަ ކަމެއް ކުރުމުން ދިވެހީންގެ މެދުގައި ވެސް ބޮޑު ނުތަނަވަސް ކަމެއް ވަނީ ވެރިވެފައެވެ.

ދިވެހި 3 ދޯންޏަކަށް ހަތިޔާރާއެކު އިންޑިއާ ސިފައިން އެރި މައްސަލައިގައި އެމްއެންޑީއެފުން ވިދާޅުވީ، ދިވެހިރާއްޖޭގެ ހާއްސަ އިގްތިސާދީ ސަރަހައްދުގައި ވަނިކޮށް ދިވެހި މަަސްދޯންޏަަކަށް ބޭރުގެ ޢަސްކަރިއްޔާއަކަށް ނިސްބަތްވާ އުޅަނދެއްގެ ބޯޑިން ޓީމަކުން މަސްދޯންޏަށް އަރާފައިވާކަމުގެ ރިޕޯޓެއް ލިބިފައިވާތީ އެކަން ބަލަމުންދާ ކަމަށެވެ. އަދި އެސަރަހައްދަށް އެމްއެންޑީއެފް ކޯސްޓްގާޑުގެ އުޅަނދެއް މިހާރު ދަތުރު ކުރަމުން ދާ ކަމަށް މީގެ ކުރިން އެމްއެންޑީއެފުން ވަނީ ވިދާޅުވެފައެވެ.