ޚަރަދު ކުޑަ ކުރުމުގެ ނަމުގައި ސިޔާސީ މުވައްޒަފުން މަގާމުތަކުން ވަކި ކުރި ނަމަވެސް އަނެއްކާވެސް އެ ފަރާތްތަކަށް އެހެން ވަޒީފާތަކެއް ދިންކަން ހާމަވެއްޖެ އެވެ.

"ތޭރަ އޮންލައިން" އަށް މައުލޫމާތު ދިން ފަރާތަކުން ބުނި ގޮތުގައި ރައީސް ޑރ.މުހައްމަދު މުއިއްޒު ވަނީ ސިޔާސީ މަގާމުތަކުން ވަކި ކުރި 248 ސިޔާސީ މުވައްޒަފުންތައް ޖެހިގެން އައި ދުވަހު އެހެން މިނިސްޓްރީއަަކަށް ވަޒީފާއަށް ވައްދާފައިވާ ކަމަށެވެ.

ސަރުކާރުގެ ޚަރަދު ކުޑަކުރުމުގެ ގޮތުން އެކުލަވާލާފައިވާ "އިކޮނޮމިކް ރީފޯމް އެޖެންޑާ"ގެ ދަށުން އެކި މިނިސްޓްރީތަކުގައި ސިޔާސީ މަޤާމުތަކުގައި ތިއްބެވި 228 މުވައްޒަފުން މަޤާމުން ވަކިކުރެއްވުމަށް ނިންމަވާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވަނީ ނިމިދިޔަ އޮކްޓޯބަރު މަހުގެ 15 ވަނަ ދުވަހުއެވެ.

7 ސްޓޭޓް މިނިސްޓަރުންނާއި، 43 ޑެޕިއުޓީ މިނިސްޓަރުންނާއި، 109 ސީނިއަރ ޕޮލިޓިކަލް ޑިރެކްޓަރުންނާއި، 69 ޕޮލިޓިކަލް ޑިރެކްޓަރުން، 15 ދުވަހުގެ ތެރޭގައި މަޤާމުން ވަކިކުރުމަށް ވަނީ ހަމަޖެހިފައެވެ. މި ފިޔަވަޅާއެކު، ސަރުކާރުގެ ޚަރަދުތަކުން، މަހަކު 5.714 ރުފިޔާ ސަލާމަތްކުރެވޭނެކަމަށް ރައީސް މުއިއްޒު އޭރު ވިދާޅުވި އެވެ.

ރައީސް އޮފީހުގެ އިސް ތަރުޖަމާނު ހީނާ ވަލީދު ހުކުރު ދުވަހު އެކްސްގައި ކުރެއްވި ޕޯސްޓެއްގައި ވިދާޅުވީ ސަރުކާރުގެ އިކޮނޮމިކް ރިފޯމް އެޖެންޑާގެ ދަށުން ޚަރަދު ކުޑަ ކުރުމަށް އަޅަމުންދާ ފިޔަވަޅު ތަކުގެ ތެރެއިން، މިހާތަނަށް 248 ސިޔާސީ މުވައްޒަފުން މަދުކުރެވިފައިވާ ކަމަށެވެ.

އެހެން ނަމަވެސް މި ފަރާތްތަކަށް އަލުން އެހެން މިނިސްޓްރީތަކުން ވަނީ ވަޒީފާދީފައިކަން ތޭރަ އޮންލައިނަށް ވަނީ ކަށަވަރުކުރެވިފައެވެ.