ރައީސް ޑރ. މުހައްމަދު މުއިއްޒުގެ ދެކަނބަލުން އާރަށަށް ކުރައްވާ ދަތުރުފުޅުތަކަށް ހަފްތާއަކު 7 ލައްކަވުރެ ގިނަ ފައިސާ ހަރަދު ކުރާކަން ހާމަވެއްޖެ އެވެ.

ރައީސް މުއިއްޒު އާރަށަށް ވަޑައިގަންނަވާ ހަފްތާއަކު 7 ލައްކަ އަށްވުރެ ގިނަ ފައިސާ ޚަރަދު ކުރައްވާ ކަމަށް ދެކެވޭ ވާހަކާއި ގުޅިގެން ނޫސްވެރިއަކު ކުރި ސުވާލަށް ރައީސް އޮފީހުގެ އިސްތަރުޖަމާނު ހީނާ ވަލީދު ވިދާޅުވީ އެއީ ރައީސްއަށް ލިބިވަޑައިގަންނަވާ އިހުތިޔާރެއް ކަމަށެވެ. ހީނާ މިފަދައިން ވިދާޅުވި ނަމަވެސް އެކަން ދޮގެއް ނުކުރައްވައެވެ.

އެ ދެ ބޭފުޅުން އާރަށަށް ވަޑައިގަންނަވާއިރު އެއްކޮށްނާއި ވަކިވަކިން ވެސް އާރަށަށް ވަޑައިގަންނަވައެވެ. މި މަންޒަރު "ތޭރަ އޮންލައިން" ގެ ބައެއް ނޫސްވެރިންނަށް ވެސް ވަނީ ފެނިފައެވެ.

އަދި ރައީސް މުއިއްޒު ވެސް ކޮންމެ ދުވަހަކު ހެން އާރަށަށް ވަޑައިގަންނަވައެވެ.މިގޮތަށް ކުރައްވާ ދަތުރުފުޅުތަކުގައި ސަރުކާރުގެ ވަޒީރުން، މެމްބަރުންގެ އިތުރުން އެ ދެބޭފުޅުންގެ ގާތް ރަހުމަތްތެރިން އަރިހުގައި ގެންދަވައެވެ.

އަދި މި ދަތުރުތަކުގައި ގާތް ބޭފުޅުން ގެންދަވާއިރު އެ މީހުންގެ ކެއިންބުއިން ފަދަ ޚަރަދުތަކަށް ވެސް ބޮޑު އަދަދެއް ހޭދަކުރާކުރެއެވެ. ޚަރަދު ކުޑަކުރުމުގެ ފިޔަވަޅުތަކެއް އަޅަމުންދާ ކަމަށް ސަރުކާރުން ބުނަމުން ދާއިރު އާރަށަށް މިހާ ބޮޑު ހޭދައެއް ކުރާކަން ހާމަވުމުން އާންމުންގެ ގިނަ ބަޔަކު އަންނަނީ ސަރުކާރަށް ފާޑުކިޔުން އަމާޒުކުރަމުންނެވެ.