މާލީ ހާލަތު ގޯސް ދަނޑިވަޅެއްގައި ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް އާއެކު މަޖިލީހުގެ ބޮޑު ވަފުދެއް އޮސްޓްރޭލިއާގެ ސިޑްނީއަށް ފުރާވަޑައިގެންފި އެވެ.
ރައްޔިތުންގެ މަޖިލީހުގެ އިދާރާ އިން ބުނީ މި ދަތުރަކީ "67 ވަނަ ކޮމަންވެލްތް ޕާލަމެންޓަރީ ކޮންފަރެންސް" ގައި ބައިވެރިވެވަޑައިގަތުމަށް ކުރައްވާ ދަތުރެއްކަމަށެވެ. ކޮންފަރެންސް ކުރިއަށްދާނީ މި މަހުގެ ތިން ވަނަ ދުވަހުން އަށް ވަނަ ދުވަހުގެ ނިޔަލަށް އޮސްޓްރޭލިއާގެ ސިޑްނީގައިކަމަށެވެ.
ނާޒިމް އާއެކު މަޖިލިސްގެ ބައެއް މެންބަރުންނާއި އިދާރާގެ ބައެއް ބޭފުޅުން މި ދަތުރުގައި ބައިވެރިވެ ވަޑައިގެންނަވާކަން މީސްމީޑިޔާގައި ދައުރުވަމުން އަންނަ މަންޒަރުތަކުން ހާމަވެއެވެ.
ރާއްޖޭގެ މާލީ ހާލަތު ދައްވެފައިވާ ދަނޑިވަޅެއްގައި ސަރުކާރުން ހަރަދުތައް ކުޑަކުރަން ފިޔަވަޅުތައް އަޅާކަމަށް ބުނެ ފެނިގެންދަނީ ކޮންމެ މަހަކުވެސް މަޖިލީހުގެ މެންބަރުންނާއި ޓީމްތައް އެކި ގައުމުތަކަށް ދަތުރުކުރާ މަންޒަރެވެ.
