ބަޖެޓް ހޭދަކުރި ގޮތް ސަރުކާރުން ސިއްރު ކުރީ ހިސާބުތައް ދިމާ ނުވާތީކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.

ރައީސް ޔާމީން މިފަދައިން ވިދާޅުވެފައި ވަނީ ބުރާސްފަތި ދުވަހުގެ ރޭ ފްރޮންޓް އޮފީހުގައި އޮތް ޖަލްސާގައި ވާހަކަދައްކަވަމުންނެވެ.

އެގޮތުން އެމަނިކުފާނު ވިދާޅުވީ ޤާސިމް އަކީ އަބަދުވެސް އިސްލާހަށް މަސައްކަތް ކުރާ ބޭފުޅެއް ކަމަށް ޤާސިމް ވިދާޅުވާ ކަމަށެވެ. އެހެންނަމަވެސް ބަޖެޓް ހޭދަކުރި ގޮތް ސިއްރުކުރަން ސަރުކާރަށް އެއްބާރުލުން ދިނުމުން އައު މެމްބަރުންނަށް އެ ދެއްކެނީ ކޮންކަހަލަ މިސާލެއްތޯ ރައީސް ޔާމީން ވަނީ ސުވާލު އުފައްދަވާފައެވެ.

އެ މަނިކުފާނު ވިދާޅުވީ ބަޖެޓް ސިއްރު ކުރަނީ ޚަރަދުތައް ދިމާނުވާތީ ކަމަށެވެ. އަދި އެކަން ސިއްރުކުރުމަކީ ވަރަށް ލަދުވެތި ކަމެއް ކަމަށް ވެސް ރައީސް ޔާމީން ވަނީ ވިދާޅުވެފައެވެ.

ސަޕްލިމެންޓްރީ ބަޖެޓް ފާސްކުރި އިރު ބަޖެޓަށް ވީ ގޮތް ސާފު ނުވާކަމަށް ފާހަގަކުރައްވާ ރައީސް ޔާމީން ވަނީ އެކަމާއި މެދު ކަންބޮޑުވުން ފާޅުކުރައްވާފައެވެ. އަދި މާލިއްޔަތު ޤަވާއިދާއި އެއްގޮތަށް މާލީ މައުލޫމާތުތައް ހާމަކުރަން ޖެހޭނެ ކަމަށް ވެސް އެ މަނިކުފާނު ވަނީ ވިދާޅުވެފައެވެ.