ކިޔެވުމުގެ ފެންވަރު ދަށް ވުމުގެ ސަބަބުން މަތީ ތައުލީމުގެ ފުރުސަތުތަކާއި ވަޒީފާތަކުން ބާކީވެފައި ތިބި ފުރާވަރު އުމުރުފުރައިގެ ޒުވާނުން ސިފައިންނާއި ފުލުހުންގެ ގޮތުގައި ތަމްރީނުކުރަން އަންނަ އަހަރު "ގައުމީ ހިދުމަތުގެ ޕްރޮގްރާމް" ފެއްޓެވުމަކީ އެއީ ގައުމަށް ބުރައަކަށް ވާނެ ކަމެއް ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ނަސްރުގެ ދުވަހުގެ މުނާސަބާގައި ޕީއެންއެފުން ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، ކިޔެވުމުގެ ރޮގުން އިތުރަށް ކުރިއަށް ނުދެވޭނެ ބަޔަކު ސަލާމަތީ ބާރުތަކަށް ވެއްދުމަކީ ރިފްރަފެއް ނޫން ކަމަށާ އެ މުއައްސަސާތަކަށް ވައްދަން ވާނީ މެރިޓު އުސޫލުން ކަމަށެވެ. އަދި އެ މުއްސަސާތަކަށް ބޭނުންވަނީ އިލްމީ ގޮތުން ދަށް ފެންވަރު ބަޔަކު ނޫން ކަމަށް ވެސް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ އޭގެ އިތުރުންވެސް އެއީ ބަޖެޓަށް ވެސް ބޮޑު ބުރައަކަށް ވެގެންދާނެ ކަމެއް ކަމަށެވެ.

ރައީސް ޔާމީން ވިދާޅުވީ ބަޔަކަށް ވަޒީފާ ލިބޭތީ އެމަނިކުފާނު ކަންބޮޑުވެވަޑައިގަންނަވަނީ ނޫން ކަމަށެވެ.