ތާކުންތާކު ނުޖެހޭ ކަންކަމުގައި ރައްޔިތުންގެ ފައިސާ އިސްރާފު ނުކުރުމަށް ޕީއެންއެފްގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ސަރުކާރަށް ގޮވާލައްވައިފިއެވެ.
މަލީހު މިފަދައިން ގޮވާލައްވާފައިވަނީ އެކްސްގައި ކުރެއްވި ޕޯސްޓެއްގައެވެ.
މަލީހު ވިދާޅުވީ ދައުލަތުގެ މުއައްސަސާއެއްގެ ޓެގް އަޅުވައިގެން އެންޓި ކޮރަޕްޝަން ކޮމިޝަން (އޭސީސީ) ނިދާފައި އޮތުމަށް ފަހު ހޭލައިގެން ރައީސް މުހައްމަދު މުއިއްޒަށް ފާޑުކިޔާ ނޫހަކަށް އެވޯޑެއް ލިބުމުން އެ މައްސަލަ ބެލުމުގެ ނަމުގައި ކުޅޭޅެމުން ދަނީ ދަށު ދަރަޖައިގެ ޑްރާމެއް ކަމަށެވެ.
މަލީހު އިތުރަށް ވިދާޅުވީ ސްކީލާން ޑޮކިއުމަންޓްރީގައި ދައްކާފައި ހުރި ވާހަކަަތައް އިންސާފުން ތަހުގީގުކޮށްފި ނަމަ ކުށްވެރިވާނީ ރައީސް މުއިއްޒު ކަމަށާ އެހެންކަމުން ތާކުން ތާކު ނުޖެހޭ ކަންކަން ކުރުމުގައި ރައްޔިތުންގެ ފައިސާ އިސްރާފު ނުކުރުމަށް މަލީހު ވަނީ ސަރުކާރަށް ގޮވާލާފައެވެ.
މަލީހު މިފަދައިން ވިދާޅުވެފައިވާއިރު، ނިމިދިޔަ ރިޔާސީ އިންތިހާބުގެ ތެރޭގައި، "އަދަދު" ނޫހުން ތައްޔާރު ކުރި ޑޮކިއުމަންޓްރީ، "ސްކީލާން"އަށް މިއަހަރުގެ ނޫސްވެރިންގެ އެވޯޑު ލިބުމުން ސަރުކާރުން ޕްރެޝަރކޮށް އެއީ ގާނޫނާ ޚިލާފަށް ދީފައިވާ އެވޯޑެއް ކަމަށާ މައްސަލަ ބަލާ ފިޔަވަޅު އެޅުމަށް އަންގާފައިވާކަން ފާހަގަކޮށްލެވެއެވެ. އަދި މައްސަލަ ބެލުމުގެ ނަމުގައި އޭސީސީއިން ވަނީ އިއްޔެގެ ވަގުތެއްގައި މޯލްޑީވްސް މީޑިޔާ ކައުންސިލް (އެމްއެމްސީ)އަށް ވަދެފައެވެ.
