ސަހްޔޫނީން ފަލަސްތީނުގެ ރެފިއުޖީންނަށް އެހީވެދޭ އދ ގެ އޭޖެންސީ (އުންރުވާ) މަނާކުރުމުން ގާޒާގެ އާންމުން ތަހައްމަލުކުރަމުންދާ ވޭން އިތުރުވެއްޖެ ކަމަށް ދުނިޔޭގެ ސިއްހަތު ޖަމުއިއްޔާގެ ވެރިޔާ ޓެޑްރޯސް އަދްނޮމް ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި އޭނާ ވިދާޅުވީ، އަންރުވާގެ ބަދަލުގައި ފަލަސްތީނަށް އެހެން އެއްވެސް ގޮތެއް ނެތްކަމަށް ސާފުކޮށް ހާމަކުރައްވާ ކަމަށާއި، އަންރުވާ މަނާކުރުމަކުން ސަހްޔޫނީންނަށް އިތުރު ރައްކައުތެރިކަމެއް ނުލިބޭނެ ކަމަށެވެ. އޭނާ އިތުރަށް ވިދާޅުވީ، މިކަމުން ވާނެ ހަމައެކަނި ކަމަކީ ޣައްޒާގެ ރައްޔިތުންގެ ދަތިތައް އިތުރުވެ، ބަލިމަޑުކަން ފެތުރުމުގެ ނުރައްކާ އިތުރުވުން ކަމަށެވެ.

ޓެޑްރޮސް މިހެން ވިދާޅުވީ އަންރްވާއާއާ އެކު ސަހްޔޫނީން ވެފައިވާ އެއްބަސްވުން އުވާލައި ގުޅުން ކަނޑާލައިފިކަން އދ. އަށް ސަހްޔޫނީން ރަސްމީކޮށް އެންގުމާ އެކުގައެވެ.

އަންރުވާއާ އޮންނަ ގުޅުން ކަނޑާލުމަށް ސަހްޔޫނީން ނިންމި ނިންމުމާ ގުޅިގެން، ސަހްޔޫނީންގެ އަނިޔާވެރިކަމަށް އެންމެ ބޮޑަށް އެހީތެރިވާ އެމެރިކާ ހިމެނޭގޮތަށް ދުނިޔޭގެ އެކި ޤައުމުތަކުން ވަނީ މިކަން ކުށްވެރިކޮށްފައެވެ.

ސަހްޔޫނީންން ފަލަސްތީނަށް ހަމަލާދޭން ފެށީ މިދިޔަ އަހަރު އޮކްޓޫބަރު މަހުގެ 7 ވަނަ ދުވަހު ކަމަށްވާއިރު، ހަނގުރާމައިގެ ސަބަބުން ގާޒާގެ 85 ޕަސެންޓު މީހުން ގެދޮރު ދޫކޮށް ވަނީ ގޮސްފަ އެވެ. އަދި ގާޒާގެ ބައި މިލިއަނެއްހާ މީހުން ބަޑުހައިހޫނުކަން އަންނަނީ ތަހައްމަލު ކުރަމުންނެވެ.

ޣައްޒާގެ ޝަހީދުންގެ އަދަދު 43،600 އިން މައްޗަށް އަރާފައިވާއިރު، ސަހްޔޫނީން އަންނަނީ ހުއްޓުމެއް ނެތި ޣައްޒާގެ އުތުރުގެ ހިސާބުތަކަށް ހަމަލާތައް އަމާޒުކުރަމުންނެވެ.