އެމެރިކާގެ ވެރިކަން ކުރާ ޑިމޮކްރެޓިކް ޕާޓީ އާއި އިދިކޮޅު ރިޕަބްލިކަން ޕާޓީން ވާން ކުރާ މި އިންތިހާބުގައި ވޯޓުލުމުގެ ހައްގު ލިބިގެންވާ މީހުންގެ އަދަދު 239 މިލިއަނަށް އަރަ އެވެ.
އެމެރިކާގެ އިންތިހާބުގައި ވާދަކުރައްވާ ކެންޑިޑޭޓުން:
އެމެރިކާގެ އެކި ސްޓޭޓުތަކުގައި ޓައިން ޒޯން ތަފާތުވުމުން، އެކި ސްޓޭޓުތަކުގައި ވޯޓުލާން ފަށާ ގަޑި ތަފާތެވެ. މިއަދު ރާއްޖެ ގަޑިން 15:00ގައި ބައެއް ސްޓޭޓުތަކުގައި ވޯޓުލާން ފަށައިފައިވާއިރު، އެންމެ ފަހުން ވޯޓު ފޮށިތައް ބަންދުކުރާނެ ކަމަށް ބެލެވެނީ އަލަސްކާގަ އެވެ.
ބޭރުގެ މީޑިއާތަކުގައިވާ ގޮތުން، އެންމެ ފަހު ހިޔާލު ހޯދުމުގެ ވޯޓުތަކުން ދައްކަނީ ޓްރަމްޕާއި ހެރިސްއަށް އޮތް ތާއިދުވެސް ވަރަށް އެއްވަރު ކަމަށެވެ.
ޓްރަމްޕް އެންމެ ފުރަތަމަ ވެރިކަން ކުރެއްވީ 2017އިން 2021އަށެވެ. އެއަށްފަހު ބޭއްވި ރިޔާސީ އިންތިހާބުގައި ނާކާމިޔާބުވުމުން ނަތީޖާ ގަބޫލުކުރައްވަން ޓްރަމްޕް ދެކޮޅު ހެއްދެވި އެވެ.
ނިމިދިޔަ ޖުލައި މަހުގެ ކުރީކޮޅު ވެސް ކަމަލާ ހުރީ ޑިމޮކްރެޓުންގެ ފަރާތުން އިންތިހާބުގައި ވާދަކުރައްވާ އެ ގައުމުގެ ރައީސް ބައިޑެންއަށް ތާއީދު ކުރައްވައިގެންނެވެ. ނަމަވެސް ބައިޑެން ރޭހުން ފަހަތަށް ޖެހި، ކަމަލާއަށް ޑިމޮކްރެޓްގެ ފުރުސަތު ދިނުމާ އެކު އެ ކަމަނާ ވަނީ ފުރުސަތުގެ ބޭނުން ހިއްޕަވައިފަ އެވެ. މިގޮތުން ވަގުތުން އިންތިހާބުގެ ކެމްޕެއިން ވެސް އެކަމަނާ ފެއްޓެވި އެވެ.
ކަމަލާ ވެގެން ގޮސްފައި ވަނީ އެމެރިކާގެ އިންތިހާބުގައި ބޮޑު ޕާޓީއަކުން ވާދަކުރައްވާ ކަޅު ނަސްލަށް ނިސްބަތްވާ ފުރަތަމަ އަންހެން މީހާ އަދި ފުރަތަމަ އޭޝިއަން/އެމެރިކަން އަށެވެ. ކަމަލާއަކީ އިންޑިއާ އަދި ޖެމައިކާއަށް ނިސްބަތްވާ އާއިލާއަކަށް ލިބިފައިވާ ކުއްޖެކެވެ.
ވޯޓުގެ ކުރިން ބީބީސީން ކުރި ސުވާލަކަށް ޖަވާބު ދެއްވަމުން ކަމަލާ ހެރިސް ވިދާޅުވީ އިންތިހާބު ކާމިޔާބު ކުރެވިއްޖެ ނަމަ އޭނާ ވެގެންދާނީ އޭނާއަށް ވޯޓު ނުދޭ މީހުން ހިމެނޭ ގޮތަށް އެމެރިކާގެ ހުރިހާ ރައްޔިތުންގެ ރައީސަކަށް ކަމަށެވެ.
ރިޕަބްލިކަން ކެންޑިޑޭޓް، ޑޮނަލްޑް ޓްރަމްޕާ ހަވާލާދީފައި ހުރި ހަބަރުތައް ބުނާ ގޮތުން، މި ފަހަރުގެ އިންތިޚާބުގައި ފޭލުވުމަކީ ވެދާނެ ކަމެއް ކަމަށް ޓްރަމްޕް ގަބޫލުކުރައްވަ އެވެ. މިފަދަ ހާލަތަކަށް ތައްޔާރަށް ހުންނެވި ކަމަށްވެސް ހަބަރުތައް ބުނެ އެވެ.
އިންތިހާބަށް ފަހު މި ވަގުތަށް ކަށަވަރުވާ އޮތީ އެންމެ ކަމެކެވެ. އެއީ މިހާރު ރައީސްގެ މަގާމުގައި ހުންނެވި ޖޯ ބައިޑަން އިންތިހާބަށް ފަހު އެ މަގާމުގައި ނުހުންނަވާނެ ކަމެވެ.
އަދި ޖެނުއަރީ މަހުގެ 6 ވަނަ ދުވަހު ކޮންގްރެސް އިން ވޯޓު ގުނައި އަދި ޖެނުއަރީ މަހުގެ 20 ވަނަ ދުވަހު އާ ރައީސް ހުވާކުރައްވާނެ އެވެ.
