އެމެރިކާގެ ރައީސް އިންތިހާބު ކުރަނީ އެގައުމުގެ ސްޓޭޓްތަކުގެ އެލެކްޓަރުން ތިއްބަވާ އިލެކްޓޯރަލް ކޮލެޖުގެ ވޯޓުންނެވެ. ރައްޔިތުންގެ ވޯޓަކީ އެމެރިކާގެ ރިޔާސީ އިންތިޚާބު ކާމިޔާބުކުރުމަށް މުހިއްމު ވޯޓެއް ނޫނެވެ. އިލެކްޓޯރަލް ކޮލެޖްގައި ތިއްބަވާ 538 އިލެކްޓަރުންގެ ތެރެއިން 270 އިލެކްޓަރުންގެ ވޯޓު ލިބޭ ބޭފުޅަކަށް އިންތިހާބު ކާމިޔާބު ކުރެވޭނެ އެވެ.

އިލެކްޓޯރަލް ކޮލެޖް ގެ ވޯޓުގެ ދެބައިކުޅަ އެއްބަޔަކީ 269 އެވެ. 270 އިލެކްޓަރުންގެ ވޯޓަކީ އަޣުލަބިއްޔަތަށްވުރެ އެއްވޯޓު ގިނަ މިންވަރެކެވެ. އެހެންކަމުން 270 ވޯޓު ލިބޭ ކެންޑިޑޭޓަކީ އިންތިޚާބު ކާމިޔާބު ކުރައްވާ ކެންޑިޑޭޓެވެ.

މިހާތަނަށް ގުނާފައިވާ ޕޮޕިއުލާ ވޯޓަށް ބެލުމަށްފަހު އިލެކްޓޯރަލް ކޮލެޖްގެ އިލެކްޓަރުންގެ ތެރެއިން 267 އިލެކްޓަރުންވަނީ ޓްރަމްޕަށް ވޯޓު ދެއްވާފައެވެ. ދެން އޭނާ ހޯއްދަވަން ޖެހޭނީ ތިނެއް އިލެކްޓަރުންގެ ވޯޓެވެ.

ކަމަލާ އަށް ބަލާއިރު އޭނާއަށް ލިބިފައިވަނީ 214 އިލެކްޓަރުންގެ ވޯޓެވެ. އިންތިޚާބު ކާމިޔާބު ކުރުމަށް ކަމަލާ އަދި އިލެކްޓަރުންގެ 56 ވޯޓު ހޯއްދަވަން ޖެހޭނެ އެވެ. މިއީ ވުމަށްވުރެ ނުވުން ގާތްކަމެއްކަމަށް އެމެރިކާގެ އިންތިހާބާބެހޭ ތަޖުރިބާކާރުން ވިދާޅުވެ އެވެ.

ނިއު ޔޯކް ޓައިމްސް އަދި ބައެއް އެހެން ނޫސްތަކުގެ އެނަލިސްޓުން ހިސާބު ޖަހާގޮތުން 300 އަށް ވުރެ ގިނަ އިލެކްޓޯރަލް ކޮލެޖު ޓްރަމްޕަށް ލިބޭނެ އެވެ.

އާންމުންގެ ވޯޓުން ވެސް މިވަގުތު ބޮޑުތަނުން ކުރީގައި އުޅެނީ ޓްރަމްޕެވެ. ޓްރަމްޕަށް 60.7 މިލިއަން ވޯޓު މިހާތަނަށް ލިބިއްޖެ އެވެ. އެއީ ގުނި ވޯޓުތަކުގެ ތެރެއިން 51 ޕަސެންޓު ވޯޓެވެ. ކަމަލާއަށް ލިބުނީ 56 މިލިއަން ވޯޓެވެ. އެއީ މިހާތަނަށް ގުނި ވޯޓުތަކުގެ ތެރެއިން 47 ޕަސެންޓު ވޯޓެވެ.

އެމެރިކާގެ ރައީސް އިންތިހާބު ކުރަނީ ދެ ބާވަތެއްގެ ވޯޓަކުންނެވެ. އެއްވޯޓަކީ ރައްޔިތުންގެ ވޯޓު ނުވަތަ ޕޮޕިއުލާ ވޯޓެވެ. އަނެއް ވޯޓަކީ އެމެރިކާގެ ސްޓޭޓްތަކުން ދޭ ވޯޓެވެ. ސްޓޭޓްތަކުން ދޭ ވޯޓަށް ކިޔަނީ އިލެކްޓޯރަލް ކޮލެޖް ގެ ވޯޓެވެ.

ރިޔާސީ އިންތިހާބު ކާމިޔާބު ކުރެވެނީ ރައްޔިތުންގެ ވޯޓަށް ބަލައި އެއަށް ރިއާޔަތްކޮށްފައި އިލެކްޓޯރަލް ކޮލެޖުގައި ތިއްބަވާ އިލެކްޓަރުން ދޭ ވޯޓުގެ އަޣްލަބިއްތު ލިބުމުންނެވެ. އެއީ އެމެރިކާގެ ރައީސަކީ ރައްޔިތުން ނުސީދާކޮށް އިންތިޚާބުކުރާ އަދި ސްޓޭޓްތަކުގެ ވޯޓުން ސީދާ ގޮތެއްގައި އިންތިޚާބު ކުރާ ބޭފުޅަކަށް ވާތީއެވެ.

މިއީ އެމެރިކާގެ ޑިމޮކްރަސީ އާއި އެމެރިކާގެ ވެރިކަމުގެ ނިޒާމު 18 ވަނަ ގަރުނުގެ ތެރޭގައި ބައްޓަންކުރެއްވި "ފައުންޑިން ފާދާސް" އިން އެގައުމުގެ ނިޒާމު ބައްޓަން ކުރައްވާފައިވާ ގޮތެވެ. އެމެރިކާގެ "ފައުންޑިން ފާދާސް" ގެ ގޮތުގައި ބެލެވެނީ 7 ބޭފުޅަކަށެވެ. އެއީ ޖޯން އެޑަމްސް، ބެންޖަމިން ފްރަންކްލިން، އެލެގްޒެންޑަރ ހެމިލްޓަން، ޖޯން ޖެއި، ތޯމަސް ޖެފްރިސަން، ޖޭމްސް މެޑިސަން އަދި ޖޯޖް ވޮޝިންޓަން މި 7 ބޭފުޅުންނެވެ.

އެމެރިކާގެ މަޖިލީހުގެ އިންތިހާބުގެ ވޯޓުލުން ވެސް މިވަގުތު ކުރިއަށްދާއިރު ޓްރަމްޕްގެ ރިޕަބްލިކަން އިން ވަނީ ސެނެޓްގެ އަޣުލަބިއްޔަތު ވެސް ހޯދައިފަ އެވެ. ޑިމޮކްރެޓްސް އަށް އަޣުލަބިއްޔަތު އޮތް ސެނެޓުގެ އަޣުލަބިއްޔަތު ވެސް ވަނީ ޓްރަމްޕުގެ ރިޕަބްލިކަން އިން ހޯދައިފަ އެވެ. މިއީ މިދިޔަ ހަތަރު އަހަރު ތެރޭ އެ ޕާޓީއަށް ސެނެޓްގެ އަޣުލަބިއްޔަތު ލިބުނު ފުރަތަމަ ފަހަރެވެ. މިއީ ކެބިނެޓާއި ސުޕްރީމް ކޯޓުގެ ފަނޑިޔާރުން ކަނޑައެޅުމުގެ ބާރު އޮންނަ މަޖިލީހުގެ މަތިގެ އެވެ.

ހައުސް އޮފް ރެޕްރެޒެންޓެޓިވްގެ އަޣުލަބިއްޔަތު ލިބޭނެ ޕާޓީއެއް އެނގޭ ވަރަށް އަދި ނަތީޖާ ސާފެއް ނުވެ އެވެ.