މި ސަރުކާރުން ރައްޔިތުންގެ ހެވާއި ލާބައަށް ސިޔާސަތުތައް ތަންފީޒު ކުރުމުގެ ނަމުގައި ޓެކްސް ރޭޓްތައް ބޮޑުކުރުމާއި ގުޅިގެން ތަކެތީގެ އަގުތައް ދަނީ އިންތިހާއަށް އުފުލެމުންނެވެ.

އިންފްލޭޝަން ރޭޓްތައް ބޮޑުވެ ދިރިއުޅުމުގެ ޒަރޫރީ ބޭނުންތައް ފުއްދުމަށް ނުކުޅެދި، ކޮންމެހެން ކުރަން ޖެހޭ ކަންކަން ނޫނީ ނުކުރެވޭ ހިސާބަށް މި ވަނީ ގޮސްފައެވެ.

ސަރުކާރުން ގެނައި މި ބަދަލުތަކާ އެކު މި އަހަރު އެކަނިވެސް ދައުލަތަށް އާމްދަނީގެ ގޮތުގައި 180.3 މިލިއަން ރުފިޔާ ލިބޭނެ ކަމަށް އަންދާޒާ ކޮށްފައިވާއިރު، މިފަދަ ނިންމުންތަކުގެ ސަބަބުން ތަކުލީފުތަކާއި ކުރިމަތިލާން ޖެހެނީ އާންމު ނިކަމެތި ރައްޔިތުމީހާއަށެވެ.

މީގެ އިތުރުން، ސިނގިރޭޓާއި ބިޑިން ނަގާ އިމްޕޯޓް ޑިއުޓީ 3ރ. އިން 8ރ. އަށް މަތިކުރަން ގާނޫނު ބަދަލުކުރުމާ އެކު ސިނގިރޭޓު ފޮށްޓެއްގެ އަގު 250ރ. އަށް މިއަދު އަރައިފި އެވެ.

ދިވެހިރާއްޖޭގެ އެކްސްޕޯޓް އިމްޕޯޓްގެ ގާނޫނަށް ގެނެވުނު އިސްލާހުތަކާ ގުޅިގެން އެކުލަވާލަންޖެހޭ ނުވަތަ އިސްލާހު ކުރަންޖެހޭ ގަވާއިދުތަކާއި އުސޫލުތައް، މިމަހުގެ 30 ވަނަ ދުވަހުގެ ތެރޭގައި ހަދައި، ސަރުކާރުގެ ގެޒެޓުގައި ޝާއިއު ކުރަން ޖެހޭ އިރު، އިގްތިސާދު ތިޔާގި ކުރުމުގެ ބަދަލުގައި ސަރުކާރުން އަންނަނީ ރައްޔިތުންގެ ފައިސާއިން ދައުލަތް ހިންގުމުގެ ފަލްސަފާ ގެންގުޅެމުންނެވެ.

ނަމަވެސް މިއީ ކުރީ ސަރުކާރުން ރައްޔިތުންގެ ޖީބުތައް ލޫޓުވަނީ ކަމަށް ބުނެ ފާޑުކީ މީހުން ތިބި ސަރުކާރެއްކަން ފާހަގަކޮށްލެވެއެވެ.