އެމެރިކާގެ ރިޔާސީ އިންތިހާބުން ނާކާމިޔާބީއާ ކުރިމަތިލާން ޖެހިވަޑައިގެންނެވި ޑިމޮކްރެޓިކް ޕާޓީގެ ކެންޑިޑޭޓް އަދި އެގައުމުގެ ނައިބު ރައީސް ކަމަލާ ހެރިސް ބަލި ގަބޫލުކުރައްވައިފިއެވެ.
ރިޔާސީ އިންތިހާބުގައި ޑިމޮކްރެޓްސްގެ ކެންޑިޑޭޓް އަދި މިހާރު ނައިބު ރައީސް ކަމަލާ ހެރިސްއާ ވާދަކުރައްވައި، އުމުރުން 78 އަހަރުގެ ޓްރަމްޕް އިންތިހާބު ކާމިޔާބު ކުރެއްވީ 277 އިލެކްޓޯރަލް ވޯޓުންނެވެ. ކަމަލާއަށް ލިބިވަޑައިގަތީ 224 އިލެކްޓޯރަލް ވޯޓެވެ.
މިއީ އެމެރިކާގައި ފަހުގެ ތާރީހެއްގައި ޖެހިޖެހިގެން ނޫން ގޮތަކަށް ރިޔާސީ ދެވަނަ ދައުރެއް ބޭފުޅަކު ކާމިޔާބު ކުރެއްވި ފުރަތަމަ ފަހަރެވެ.
ޓްރަމްޕް ވަނީ ކާމިޔާބީ އިއުލާން ކުރައްވައި އެމެރިކާގެ ރައްޔިތުންނަށް ޝުކުރު އަދާކުރައްވައިފަ އެވެ. އަދި ދެން އޮތީ އެގައުމުގެ "ރަން ޒަމާނެއް" ކަމަށް ވިދާޅުވިއެވެ.
ކަމަލާއަށް ތާއީދުކުރެއްވި އަދި ވެރިކަމަށް ހޮވުމަށް މަސައްކަތް ކުރެއްވި ސަޕޯޓަރުނާ މުހާތަބުކުރައްވައި، އިންތިހާބުގެ ނަތީޖާ ގަބޫލުކުރަމަށް ވަނީ އެދިވަޑައިގެންފައެވެ.
ކަމަލާ ވިދާޅުވީ ވެރިކަން ބަދަލުވެގެންދާ މަރުހަލާތަކުގައި އޭނާގެ ސަރުކާރުން ހުރިހާ އެއްބާރުލުމެއް، އިންތިހާބީ ރައީސް ޑޮނަލްޑް ޓްރަމްޕަށް ދެއްވާނެ ކަމަށެވެ.
އިންތިހާބުގެ ކެމްޕޭނުގައި ކުރެވުނު މަސައްކަތްތަކާއި މެދު ފަހުރުވެރިވާ ކަމަށާއި އިންތިހާބުން ބަލިވި ނަމަވެސް އެމެރިކާގެ ހައްގުގައި ކުރާ މަސައްކަތަށް މަޑުޖެހުމެއް ނާންނާނެ ކަމަށް ހެރިސް ވިދާޅުވިއެވެ.
