ގެދޮރުވެރި ސްކީމްގެ ދަށުން ނިމިފައި އަދި ލިޔުން ހަވާލުކޮށްފައި ހުރި ފްލެޓްތަކާއި ބިންތައް އަލުން އިވޭލުއޭޓްކުރުމަކީ ގާނޫނީ ގޮތުންވެސް ކުރެވިގެންވާނެ ކަމެއް ނޫން ކަމަށާއި އެއީ ސީދާ ކޮރަަޕްޝަނަށް ހުށަހެޅޭފަދަ ކަންތައްކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ޕީއެންއެފްގެ ފްރޮންޓް އޮފީހުގައި ރޭ ކުރިއަށްދިޔަ ޖަލްސާގައި ވާހަކަފުޅު ދައްކަވަމުންނެވެ.

މިދިޔަ ހަފްތާގެ ފްރޮންޓް އޮފީސް ޖަލްސާގައިވެސް ރައީސް ޔާމީން ވަނީ ގެދޮރުވެރި ސްކީމްގެ ދަށުން މިދިޔަ ސަރުކާރުން ހަވާލުކޮށްފައިވާ ފްލެޓްތައް ނުދީ ލަސްކުރަމުންދާތީ މިހާރުގެ ހައުސިންގ މިނިސްޓަރ އަށް ވަރަށް ބޮޑަށް ފާޑު ވިދާޅުވެފައެވެ.

ރައްޔިތުންގެ މަސްލަހަތާއި ގުޅިފައިވާ މިފަދަ ކަންކަން އަބަދުވެސް އެންމެ ކައިރިން ރައީސް ޔާމީން ބައްލަވަމުން އަންނައިރު، މިރޭގެ ޖަލްސާގައިވެސް އެމަނިކުފާނު ވަނީ މި މައްސަލައިގައި ކަންބޮޑުވުން ފާޅުކޮށްފައެވެ.

މިގޮތުން، އޭސީސީން ފްލެޓް ދިނުމުގެ މަޝްރޫއުގައި މައްސަލައެއް އުޅޭ ކަމަށް ނުދެކޭހާ ހިނދަކު ކުރީ ސަރުކާރަކުން ދީފައިވާ ފްލެޓް/ބިން ތައް އާ ސަރުކާރެއް އައިސް ބަދަލުނުކުރެވޭނެ ކަމަށް ރައީސް ޔާމީން ފާހަގަކުރެއްވިއެވެ.

މިނިސްޓަރ އަލީ ހައިދަރު ކަންތައް އެ ކުރައްވަނީ ސީދާ ރައީސް މުއިއްޒުގެ އިރުޝާދުގެ ދަށުން ކަމަށާއި މުއިއްޒު އަކީ ރައްޔިތުންގެ ހެވަށް އެއްވެސް މަސައްކަތެއް ކުރައްވާނެ ފަރާތެއް ނޫން ކަމަށް ރައީސް ޔާމީން ސިފަކުރެއްވިއެވެ.

މީގެ އިތުރުން، އަންނަ ކޮންމެ ސަރުކާރަކުން އޭގެ ކުރީގެ ސަރުކާރަކުން ދީފައި ހުންނަ ތަންތަން އަތުލަމުން ދުވާނީތޯ ރައީސް ޔާމީން ވަނީ ސުވާލު އުފައްދަވާފައެވެ.