އެމެރިކާގެ ކުރީގެ ރައީސް ޑޮނަލްޑް ޓްރަމްޕް ރިޔާސީ އިންތިހާބު ކާމިޔާބު ކުރައްވައި، ރިޔާސީ ދެވަނަ ދައުރު އެވަނީ ކަށަވަރު ކުރައްވައިފަ އެވެ.

ރިޔާސީ އިންތިހާބުގައި ޑިމޮކްރެޓްސްގެ ކެންޑިޑޭޓް އަދި މިހާރު ނައިބު ރައީސް ކަމަލާ ހެރިސްއާ ވާދަކުރައްވައި، އުމުރުން 78 އަހަރުގެ ޓްރަމްޕް އިންތިހާބު ކާމިޔާބު ކުރެއްވީ 277 އިލެކްޓޯރަލް ވޯޓުންނެވެ. ކަމަލާއަށް ލިބިވަޑައިގަތީ 224 އިލެކްޓޯރަލް ވޯޓެވެ.

މިއީ އެމެރިކާގައި ފަހުގެ ތާރީހެއްގައި ޖެހިޖެހިގެން ނޫން ގޮތަކަށް ރިޔާސީ ދެވަނަ ދައުރެއް ބޭފުޅަކު ކާމިޔާބު ކުރެއްވި ފުރަތަމަ ފަހަރެވެ.

ޑިމޮކްރެޓިކް ޕާޓީގެ މިއަހަރުގެ ފުރަތަމަ ރިޔާސީ ކެންޑިޑޭޓް ބައިޑަން ރޭހުން ވަކިވެވަޑަައިގެން، ހެރިސްއަށް ތާއިދު ކުރައްވާކަން އިއުލާން ކުރެއްވީ މިދިޔަ ޖުލައި މަހުގެ 21ގައެވެ. އެއީ އެ ޕާޓީގެ އިސް ފަރާތްތަކު ވެސް ބައިޑަންގެ ކެންޑިޑެސީއާ ދެކޮޅުކަން ހާމަކުރި ފަހުން ކަމަށް ރިޕޯޓުތަކުގައިވެ އެވެ.

ބައިޑަން ވަނީ، ގައުމުގެ ރައްޔިތުންގެ ނިންމުން ސަރުކާރުން ބަލައިގަންނަ ކަމަށް ވިދާޅުވެ ޓްރަމްޕަށް މަރުހަބާ ވިދާޅުވެފައެވެ. އަދި ޑިމޮކްރެޓިކް ޕާޓީގެ ކެންޑިޑޭޓް އަދި ނައިބު ރައީސް ކަމަލާ ހެރިސް ކުރެއްވި މަސައްކަތަށް ބައިޑަން ޝުކުރުވެސް އަދާކުރެއްވި އެވެ.

ޓްރަމްޕް އެންމެ ފުރަތަމަ ވެރިކަން ކުރެއްވީ 20 ޖެނުއަރީ 2017 އިން 20 ޖެނުއަރީ 2021 އަށެވެ. އެ ފަހަރު އިންތިހާބު ކާމިޔާބުކުރެއްވީ ވެސް އެމެރިކާގެ މަދު އަންހެން ރިޔާސީ ކެންޑިޑޭޓުންގެ ތެރޭގައި ހިމެނިވަޑައިގެންނެވި ހިލަރީ ކްލިންޓަނާ ވާދަކުރައްވަ އެވެ.

ޓްރަމްޕް ވިދާޅުވީ އޭނާގެ ސަރުކާރު ވާނީ ނަތީޖާ ނެރޭ އަދި ވަރަށް ސީރިއަސް ސަރުކާރެއް ކަމަށެވެ. ނަތީޖާ ނުނެރެވޭ ނަމަ މަގާމުތަކުގައި ވަޒީރުންނާއި ވެރިން ތިއްބެވުމުގެ ބޭނުމެއް ނެތް ކަމަށްވެސް އޭނާ ވިދާޅުވި އެވެ.