އެގޮތުން "ބުނި ބަސް" ސެގްމެންޓްގައި މިއަދު މިބަލާލަނީ 14 އޮކްޓޫބަރު 2023 ވަނަ ދުވަހު ރައީސް މުއިއްޒު ދެއްކެވި ވާހަކަފުޅަކަށެވެ.

ރައީސް އަބްދުﷲ ޔާމީން ޖަލުން ގޭ ބަންދަށް ބަދަލުކުރީ ގާނޫނީ އިމުގެ ތެރެއިން ކަމަށާއި ޔާމީނަށް އުފުލާފައިވަނީ ސިޔާސީ ދައުވާއެއް ކަމަށް ރައީސް ޑރ. މުހައްމަދު މުއިއްޒު އެދުވަހު ވިދާޅުވިއެވެ.

މުއިއްޒު މިހެން ވިދާޅުވީ އަލް ޖަޒީރާގެ "ޓޯކް ޓު އަލް ޖަޒީރާ" ޕްރޮގްރާމް ވާހަކަފުޅު ދައްކަވަމުންނެވެ.

މިޕްރޮގްރާމްގައި މުއިއްޒު ވަނީ އެމަނިކުފާނުގެ ވެރިކަމުގައި ކޮރަޕްޝަނާއި ދެކޮޅަށް މަސައްކަތް ކުރައްވާނެ ކަމަށް ވިދާޅުވެ އެކަމުގެ ޔަގީންކަން ދެއްވާފައެވެ.

ޕްރޮގްރާމްގެ ޕްރެޒެންޓަރު ވަނީ ރިޝްވަތު ގަބޫލުކުރުމުގެ ކުށުގެ ދައުވާ ސާބިތުވެފައިވާ ރައީސް ޔާމީން މިނިވަން ކުރައްވާނެ ކަމަށް މުއިއްޒު ވިދާޅުވެފައިވާތީ އެކަމާ ގުޅޭ ގޮތުން ސުވާލު ކުރައްވާފައެވެ.

ރައީސް ޔާމީން ގޭ ބަންދަށް ބަދަލުކުރުމުގެ ބަދަލުގައި ޝަރުއީ ނިޒާމުގެ ތެރެއިން މައްސަލަ ކުރިއަށް ގެންގޮސް ރައީސް ޔާމީން މިނިވަން ނުކުރީ ކީއްވެގެންތޯ ޕްރެޒެންޓަރު ސުވާލު ކުރެއްވުމުން މުއިއްޒު ވިދާޅުވީ ޖަލު ހުކުމެއް ތަންފީޒުކުރާ މީހަކު ގޭ ބަންދަށް ބަދަލުކުރުމަށް ގާނޫނުން ސަރުކާރާއި ރައީސުލްޖުމްހޫރިއްޔާ ފުރުސަތު ދޭ ކަމަށެވެ.

ރާއްޖޭގެ ޝަރުއީ ނިޒާމު މިނިވަން ކަމަަށް ގަބޫލުކުރައްވަންތޯ ސުވާލުކުރުމުން މުއިއްޒު ވަނީ ރާއްޖޭގެ ޝަރުއީ ނިޒާމު މިނިވަން ނޫން ކަމަށް ވިދާޅުވެފަ އެވެ.

މުއިއްޒު ވިދާޅުވީ ޝަރުއީ ނިޒާމު މިނިވަން ކުރުމުގެ މަސައްކަތް އެމަނިކުފާނުގެ ވެރިކަމުގެ ފުރަތަމަ ދުވަހު ފައްޓަވާނެ ކަމަށާއި އެކަމަށް ފިޔަވަޅުތަކެއް އަޅުއްވާނެ ކަމަށެވެ.

އެގޮތުން އެއް ކަމަކަށް ޖުޑިޝަލް ސާވިސް ކޮމިޝަން ސިޔާސީވެފައި އޮތް އޮތުން ނިމުމަކަށް ގެނެސް ގާނޫނު ބަދަލުކޮށް ސިޔާސީ ނުފޫޒު ޖޭއެސްސީއަށް ނުފޯރާ ގޮތް ހައްދަވާނެ ކަމަށް މުއިއްޒު ވިދާޅުވި އެވެ.