އެމެރިކާގައި ނޮވެމްބަރު ފަހެއްގައި އޮތް ރިޔާސީ އިންތިހާބުގެ ކުރިން ޑޮނަލްޑް ޓްރަމްޕް އަވަހާރަކޮށްލަން އީރާނުން ރޭވި ކަމަށް އެމެރިކާއިން ކުރާ ތުހުމަތުތައް އީރާން ސަރުކާރުން ދޮގުކޮށްފިއެވެ.

މި މައްސަލައިގައި އީރާނުގެ ފޮރިން މިނިސްޓަރ އައްބާސް އަރަގްޗީ ވިދާޅުވީ މިއީ "ނުބައި" ތުހުމަތުތަކެއް ކަމަށާއި، މިއީ އިސްރާއީލާއި އަދި ގައުމުން ބޭރުގައި ތިބި އީރާނާ އިދިކޮޅު ފަރާތްތަކުން "އެމެރިކާއާއި އީރާނާ ދެމެދު ކަންކަން އުނދަގޫކުރުމަށް" އުފައްދާފައިވާ ވާހަކަތަކެއް ކަމަށެވެ.

މީގެ އިތުރުން އީރާންގެ ހާރިޖީ ވުޒާރާގެ ތަރުޖަމާން އިސްމާއީލް ބަޣާއީ ވިދާޅުވި ގޮތުގައި އެމެރިކާގެ ތުހުމަތަކީ އީރާނަށް ބޮޑު ގެއްލުމެއް ދިނުމަށް ދައްކާ ވާހަކަ އެކެވެ. އެއީ އީރާންގެ ގަސްދުގައި އޮތް ކަމެއް ނޫން ކަމަށްވެސް ވިދާޅުވިއެވެ.

ތަރުޖަމާން ވިދާޅުވީ ދުނިޔޭގެ މަސްރަހު މިހާރު އޮތް ގޮތުން އެފަދަ ވާހަކަތައް ދެއްކުމަކީ ގައުމަށް ބޮޑު ނުރައްކަލެއް ކުރިމަތިވެދާނެ ކަމެއް ކަމަށެވެ.

ބަޣާއީ ވިދާޅުވި ގޮތުގައި އެމެރިކާއިން މީގެ ކުރިންވެސް އީރާންގެ ބޮލުގައި ތުހުމަތުތަކެއް އެޅުވި އެވެ. އެއީ ޕާކިސްތާން މީހަކު ލައްވައި އެމެރިކާގައި ލޭއޮހޮރުވުމެއް ހިންގަން އީރާނުން ރާވާ ކަމަށް ބުނެ އެވެ. ނަމަވެސް އެފަދަ އެއްވެސް ހަރަކާތެއް އީރާނަށް ނިސްބަތްކުރެވޭ މީހަކު އެމެރިކާގައި ހިންގާފައި ނުވާނެ ކަމަށް ތަރުޖަމާން ވިދާޅުވިއެވެ.

މި އަހަރު ތެރޭ ވަނީ ޓްރަމްޕް އަވަހާރަކޮށްލަން ދެ ފަހަރަކު މަސައްކަތްކޮށްފަ އެވެ. ފުރަތަމަ ހަމަލާ ދިނީ އޭނާ ކެމްޕެއިން ރެލީއެއްގައި ވާހަކަ ދައްކަން ހުންނަވަނިކޮށެވެ. އެފަހަރު ސަލާމަތްވީ ބޮލަށް އަމާޒުކުރި އުންޑަ، ކަންފަތު ފޫޅުގަނޑަށް އެރުމުންނެވެ.

ޓްރަމްޕް އަވާރަކޮށްލަން އީރާންގެ އެޖެންޓުން އެެމެރިކާގައި ހަރަކާތްތެރިވާ ކަމަށް އެމެރިކާގެ ޖަސްޓިސް ޑިޕާޓްމަންޓުން ތުހުމަތުކުރެ އެވެ. އަދި އެމެރިކާގައި ދިރިއުޅޭ އިޒުރޭލު ރައްޔިތުންނަށް ހަމަލާދިނުމަށް އީރާނުން މީހުން ތަމްރީންކުރާ ކަމަށްވެސް އެމެރިކާ ތުހުމަތުކުރެއެވެ.

އެމެރިކާގެ ޖަސްޓިސް ޑިޕާޓްމަންޓުން ބުނީ ޓްރަމްޕް އަވަހާރަކޮށްލަން ރޭވީ އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އިން ކަމަށާއި އެއީ 2020 ވަނަ އަހަރު އެމެރިކާގެ ރައީސްކަމުގައި ޓްރަމްޕް ހުންނެވި އިރު އޭނާގެ އަމުރަށް ދިން ހަމަލާއެއްގައި އައިއާރްޖީސީގެ ޖެނެރަލް ގާސިމް ސުލައިމާނީގެ އަވަހާރަކޮށްލުމުގެ ބަދަލު ހިފުމަށް ކަމަށެވެ.