"ނުބައި ރޭވުމުގެ ތެރެއިން", ވެރިކަމުގެ ނިޒާމު ރަސްކަމަކަށް ބަދަލު ކުރަން ދަނީ މަސައްކަތް ކުރަމުންކަމަށް އެމްޑީޕީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެއެވެ.

ފައްޔާޒު މިފަދައިން ވިދާޅުވެފައިވަނީ އެމްޑީޕީއިން ރޭ ބޭއްވި ހަރުގެ ޖަލްސާގައި ވާހަކަ ދައްކަމުންނެވެ.

ފައްޔާޒް ވިދާޅުވީ ސަރުކާރުން ނަގާނެ ކަމަށް އިއުލާން ކޮށްފައިވާ ފެންނަ ނުފެންނަ ދެ ވޯޓަކީ ރައީސް ޑރ. މުހައްމަދު މުއިއްޒުގެ "ނުބައި ރޭވުމުގެ ތެރެއިން" ރަސްކަމަކަށް ވެރިކަމުގެ ނިޒާމު ބަދަލު ކުރަން ކުރަމުންދާ މަސައްކަތެއް ކަމަށެވެ.

އެގޮތުބް މިހާރު ފެނިގެން މިދަނީ މި ގައުމު ވަރަށް ނުބައި ދިމާލަކަށް ގެންދާތަން ކަމަށާ އެއް އަހަރު ވަންދެން އިދިކޮޅު ޕާޓީއެއްގެ ޒިންމާ އުފުލާ އެމްޑީޕީއިން ވެރިކަން ކުރަން ސަރުކާރަށް ފުރުސަތު ދީފައިވާނެ ކަމަށް ފައްޔާޒް ވިދާޅުވިއެވެ.

ފައްޔާޒް ވިދާޅުވީ ސަރުކާރުން ވެރިކަމަށް އައުމުގެ ކުރިން ދެއްކި މެނިފެސްޓޯއާ ތަފާތު މެނިފެސްޓޯއެއްގެ ވާހަކަ މިހާރު ދައްކަމުންދާކަން ފާހަގަކުރައްވޭ ކަމަށާ އެގޮތުން ހަރަދު ކުޑަ ކުރުމަށް ކަމަށް ބުނެ މަޖިލިސް އިންތިހާބާއި ރިޔާސީ އިންތިހާބު އެއްކޮށްލަން މަސައްކަތް ކުރަނީ ފާރަވެރި ދައުލަތެއްގެ ސިފަ ގެއްލުވާލަން ކަމަށެވެ.

ސަރުކާރުން ބޭނުންވަނީ ފައިސާ އާއި ބާރާއި ނުފޫޒުގެ ތެރެއިން ވެރިކަމާއި މަޖިލިސް އެއްކޮށް ނިގުޅައިގަންނަން ކަމަށާއި އެއީ އެއްގޮތަކަށް ވެސް ދޫކޮށްލައިގެން ތިބެވޭ ވަރުގެ ކަންތައްތަކެއް ނޫން ކަމަށް ފައްޔާޒް ވިދާޅުވިއެވެ.

ފައްޔާޒް މިފަދައިން ވިދާޅުވެފައިވާާއިރު ރައީސް އަބްދުﷲ ޔާމީން ވެސް ވަނީ ރައީސް މުއިއްޒުގެ މިސްރާބު މިހާރު ހުރި ދިމާލާ މެދު ސުވާލު އުފައްދަވާ ކަންބޮޑުވުން ފާޅުކުރެއްވާފައެވެ.