ސިފައިންނާއި ފުލުހުންގެ މެޑިކަލް ވެލްފެއާ ސްކީމް އުވާލައި ޕްރައިވެޓް އިންޝުއަރެންސް ނިޒާމަކަށް ބަދަލުކުރަން ސަރުކާރުން ނިންމައިފިއެވެ.

ފުލުހުންނާއި ސިފައިންގެ ހިދުމަތުގެ އިންޝުއަރެންސަށް ދައުލަތުން ކޮންމެ އަހަރަކުވެސް އެތައް މިލިއަން ރުފިޔާއެއް ހަރަދުކުރެ އެވެ. އެގޮތުން މި އަހަރުގެ ނިޔަލަށް މި ދެ މުއައްސަސާގެ އިންޝުއަރެންސްއަށް ގާތްގަނޑަކަށް މި އަހަރުގެ ނިޔަލަށް 321.7 މިލިއަން ރުފިޔާ ހަރަދުވާނެއެވެ. 

ސަރުކާރުން ފާހަގަކުރި ގޮތުގައި މިހާރު މި އިންޝުއަރެންސްގައި ވަކި ލިމިޓެއް ނޯވެ އެވެ. ނަތީޖާއެއްގެ ގޮތުން ކޮސްމެޓިކް ޕްރޮސީޖާތަކާއި ބައެއް ކޮންޒިއުމަބަލްސްވެސް މި ސްކީމުގެ ތެރެއިން ލިބޭނެ އިންތިޒާމު އޮންނަނީ ހަމަޖެހިފައެވެ. 

އެހެންކަމުން ސަރުކާރުން ނިންމާފައިވަނީ އެ ސްކީމުގެ ބަދަލުގައި ފުލުހުންނާއި ސިފައިންނާއި އެމީހުންގެ އއިލާތަކަށް އެއް ހަމަަކޮށް ޕްރައިވެޓް އިންޝުއަރެންސް ހަމަޖެއްސުމަށެވެ. އަދި އިންޝުއަރެންސް ހަމަޖެއްސުމަށް ހަރަދުކުރެވޭނެ ވަކި ލިމިޓެއް ކަނޑައެޅުމަށްވެސް ސަރުކާރުން ނިންމާފައިވެ އެވެ. 

މިއަދު ސަރުކާރުން ގެޒެޓުކުރި ބަޖެޓު ފޮތުގައި ބުނެފައިވާ ގޮތުން ފުލުހުންނާއި ސިފައިންގެ އިންޝުއަރެންސް ނިޒާމަށް ގެންނަ ބަދަލުތައް އަންނަ އަހަރުގެ ކުރީ ކޮޅުގައި ތަންފީޒުކުރުމަށް ސަރުކާރުން އަންނަަނީ މަސައްކަތް ކުރަމުންނެވެ. 

ސިފައިންނާއި ފުލުހުންގެ އިންޝުއަރެންސަށް މިދިޔަ އަހަރަށް ކަނޑައެޅި ބަޖެޓަށް ވުރެން 35 ޕަސެންޓް އިތުރަށް ހޭދަކޮށްފައިވާ ކަމަށް އޮޑިޓް ރިޕޯޓުގައި ވެސް ފާހަގަކޮށްފައިވެ އެވެ. އޮޑިޓް އޮފީހުން ބުނެފައިވާ ގޮތުގައި ބަޖެޓުގައި އިތުރު އިންޝުއަރެންސްތަކަށް 179 މިލިއަން ރުފިޔާ ކަނޑައަޅާފައިވާ އިރު އަހަރު ނިމުނު އިރު އެ އަދަދު ހުރީ 241 މިލިއަން ރުފިޔާގައެވެ.