ކުއްލި ގޮތަކަށް ރާއްޖޭގެ ޓޫރިސްޓް ފެސިލިޓީތަކަށް އަމާޒުކޮށް، އެ ފެސިލިޓީތަކަށް ލިބޭ ޑޮލަރު މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ކަނޑައަޅާ ގޮތެއްގެ މަތިން އެކައުންޓެއްގައި ބަަހައްޓާ، އަންނަ ކޮންމެ ފަތުރުވެރިއަކަށް ރިސޯޓެއްގައި ނަމަ 500 ޑޮލަރު މާރުކުރަން މަޖުބޫރުވާ ގޮތައް އެމްއެމްއޭ އިން ބޭރު ފައިސާގެ ގަވާއިދަށް ގެނައި ބަދަލަށް އަމަލު ނުކުރާނެކަން، ޔުނިވާސަލް އިން ވެސް އަންގައިފި އެވެ.

ޔުނިވާސަލް އެކަން އެންގެވީ އެ ކުންފުނިން ރާއްޖޭގައި ހިންގާ 8 ރިސޯޓު ކަމަށްވާ، ކުރުނބާ މޯލްޑިވްސް އާއި ވެލައްސަރު މޯލްޑިވްސް އާއި ބަރޮސް މޯލްޑިވްސް އާއި ހުވަފެންފުށި މޯލްޑިވްސް އާއި ކުރަމަތި މޯލްޑިވްސް އާއި މިލައިދޫ މޯލްޑިވްސް އަދި ދިގަލި މޯލްޑިވްސް ނަމުގައި ގަވަރުނަރު އަހުމަދު މުނައްވަރަށް ފޮނުއްވި ސިޓީއެއްގަ އެވެ.

އެ ސިޓީ އެމްޔޫ މަނިކު ވިދާޅުވީ، ޑޮލަރު މާރުކުރަން ޖެހޭ ގަވާއިދު ހަދާފައި އޮތީ ޓޫރިޒަމް އިންޑަސްޓްރީއާ މަޝްވަރާކުރުމެއް ނެތި، ރިސޯޓް ހިންގާ މީހުންނަށް އިންސާފުވެރި ގޮތަކަށް ނޫން ކަމަށެވެ.

އިތުރަށް އެ ސިޓީގައި ފާހަގަކުރީ އެ ސިޔާސަތު އެކުލަވައިލާފައިވަނީ ރިސޯޓު ހިންގާ ގޮތުގެ އަސާސްތަކަށް ނުބަލައި ކަމަށެވެ. އެގޮތުން ރިސޯޓެއް ހިންގުމަށް ހޭދަވާ ހަރަދުގެ 90 އިންސައްތަ ހަރަދަކީ ޑޮލަރުން ކުރަންޖެހޭ ހަރަދުކަމަށާއި، އެގޮތުން ރިސޯޓު ސަޕްލައި ހޯދުމާއި ސްޕެއާ ޕާޓްސް ގަތުމާއި ތެޔޮ ގަތުމާއި މުވައްޒަފުންގެ މުސާރައާއި މޭކެޓިން ހަރަދުތަކާއި އޮންލައިން އޮޕަރޭޓަރުންނަށް ފައިސާ ދެއްކުމާއި ކްރެޑިޓް ކާޑުތަކުގެ ކޮމިޝަން ދެއްކުމަކީ ރިސޯޓުތަކުން ޑޮލަރުން ހޭދަކުރަންޖެހޭ ކަމެއް ކަމަށެވެ.

އަދި އިތުރު ހަރަދުތަކުގެ ތެރޭގައި ފައިނޭންސްކުރުމުގެ ހޭދައާއި ދަރަނި އަދާކުރުމާއި ބިމު ކުއްޔާއި ޓިޖީއެސްޓީ އަދި ގްރީން ޓެކުހަކީވެސް ޑޮލަރުން ކުރަންޖެހޭ ހަރަދުތަކެއްކަން އެމްޔޫ މަނިކުގެ ސިޓީގައި ފާހަގަކުރައްވާފައިވެ އެވެ.

އެގޮތުން މިސާލެއްގެ ގޮތުގައި ފާހަގަކުރެއްވީ ހަތަރު މީހުންގެ އާއިލާއެއް 250 ޑޮލަރަށް ވިއްކާ ކޮޓަރިއެއްގައި ހަތަރު ރޭ ހޭދަކުރުމުން ރިސޯޓަށް ލިބޭނީ 1،000 ޑޮލަރު ކަމަށްވީ ނަމަވެސް 2،000 ޑޮލަރު މާރުކުރަންޖެހޭނެ ކަމަށެވެ.

އިތުރަށް އެމްޔޫމަނިކު ވިދާޅުވީ ޑޮލަރު މާރުކުރުން ލާޒިމުކުރުމަށް ގަވާއިދު ހަދާފައިވަނީ ރާއްޖޭގައި ޑޮލަރު އެއްކުރާ ގޮތް ރަނގަޅަށް ފަހުމުނުވުމުގެ ސަބަބުން ކަމަށް ގަބޫލުކުރައްވާ ކަމަށެވެ. އެގޮތުން ޔުނިވާސަލް ކުންފުނީގެ ހުރިހާ އެކައުންޓެއް ހުންނާނީ ދިވެހިރާއްޖޭގެ ބޭންކުތަކުގައިކަން ފާހަގަކުރައްވަމުން އެ ސިޓީގައި އުމަރު މަނިކު ވިދާޅުވީ ދާދިފަހުން ޓެކްސް ގަވާއިދުތަކަށް ގެނައި ބަދަލުތަކާއެކު ޓެކުހުގެ ގޮތުގައި ހުރިހާ ފައިސާއެއް ދައްކަމުންދަނީ ޑޮލަރުން ކަމަށެވެ.

އުމަރު މަނިކު ފާހަގަކުރެއްވި ގޮތުގައި ރިސޯޓެއްގެ ޖުމްލަ އާމްދަނީގެ %30 ހަރަދުވަނީ މީރާއަށް ޓެކުސް ދެއްކުމަށެވެ.

ސިޓީގައި ބަޔާން ކުރެއްވި ކަންކަން އިސްލާހުކޮށް، ޓޫރިޒަމް ދާއިރާ އަށް ފައިދާވާނެ ގޮތަކަށް ގަވައިދު ބަދަލުކުރުމަށް ރާއްޖޭގެ ޓޫރިޒަމްގެ ބާނީންގެ ތެރޭގައި ހިމެނިވަޑައިގަންނަވާ އެމްޔޫ މަނިކު ވިދާޅުވި އެވެ.

ޔުނިވާސަލްގެ ފަރާތުން އޭނާ މިގޮތަށް އެދިވަޑައިގެންފައި ވާއިރު، ޓޫރިޒަމް ދާއިރާގައި ރާއްޖޭގެ އެންމެ ބޮޑު އެއް ވިޔަފާރިވެރިޔާ ކަމަށްވާ ޗަމްޕާ ބްރަދާސްގެ ވެރިޔާ މުހައްމަދު މޫސާ (އުއްޗު) ވަނީ އެ ގަވާއިދު ސަސްޕެންޑް ކުރުމަށް އެދިވަޑައިގެންފަ އެވެ.

ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓްހައުސްތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ މަގުން ބޭންކަށް ޑޮލަރު މާރު ކުރަން މަޖުބޫރުކޮށް އެމްއެމްއޭ އިން އޮކްޓޯބަރު 1 ގެޒެޓުކުރި ގަވާއިދުގެ ދަށުން އެ ފަދަ ތަންތަން އެމްއެމްއޭގައި ރަޖިސްޓްރީވުމަށް ދީފައި އޮތް ސުންގަޑިއަކީ އޮކްޓޯބަރު 30 އެވެ.