ވިޔަފާރިވެރިންގެ ކުދި އަދި ބޮޑެތި އިންވެސްޓްމަންޓްތަކަށް ދަތިވާ ގޮތަށް މުއިއްޒު ސަރުކާރުން ގަވާއިދުތަކާއި ސިޔާސަތު އެކުލަވާލުމުން އޭގެ އަސަރުކުރާނީ މުޅި އިގުތިސޯދަށާއި ނިކަމެތި ދިވެހި ރައްޔިތުންނަށް ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.

ޓޫރިސްޓު ރިސޯޓުތަކުން ކޮންމެ މަހެއްގެ ތެރޭ އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ ރޭޓުން އެ މަހެއްގައި އައިސްފައިވާ ޖުމުލަ ފަތުރުވެރިންނަށް ޖެހޭ އަދަދު މާރުކުރަން މަޖުބޫރުކުރުމަށް މިދިޔަ މަހުގެ އެކެއްގައި އެމްއެމްއޭއިން ވަނީ ގަވައިދެއް ގެޒެޓުކޮށްފަ އެވެ.

އެ ގަވައިދަށް ހަމަ އެދުވަހު ވަނީ އަމަލުކުރަން ފަށައިފައެވެ. ނަމަވެސް އެ ގަވާއިދަށް ރާއްޖޭގެ ބޮޑެތި ވިޔަފާރިވެރިންނާއި ކުދި އަދި މެދުފަންތީގެ ވިޔަފާރިވެރިން އަންނަނީ ފާޅުގައި ދެކޮޅު ހަދަމުން ނެވެ.

ޕީއެންއެފުން ރޭ ބޭއްވި ފްރޮންޓް އޮފީސް ޖަލްސާގައި ވާހަކަފުޅުދައްކަވަމުން ރައީސް ޔާމީން ވިދާޅުވީ ޑޮލަރު މާރުކުރުމަށް ސަރުކާރުން ގެންގުޅެނީ ދެކޮޅު ޖެހޭ ސިޔާސަތެއް ނޫން ކަމަށެވެ. ސަރުކާރުން އެ ވަރުގެ ގަވާއިދެއް އެކުލަވާލާ އަމަލު ކުރުމުގެ ކުރިއަށް ބަލަން ޖެހޭ ގިނަ ކަންކަން ބަލާފައި ނެތް ކަމަށް ވެސް އެ މަނިކުފާނު ވިދާޅުވި އެވެ.

ދެން ރައީސް ޔާމީން ކުރެއްވީ ސުވާލެކެވެ. ވިދާޅުވީ އެ މީހުންގެ ވިޔަފާރިތަކުން، ވަސީލަތްތައް ބޭނުންކޮށްގެން ކިތައް ދިވެހި ޒުވާނުންނަށް ވަޒީފާ ދީފައި އެ ހުރި ތޯ އެވެ؟ މި ރިސޯޓުތައް ބަންދުކުރަން ޖެހެއްޖެއްޔާ ސަރުކާރަށް އެ ވަޒީފާތައް ދެވޭ ހެއްޔެވެ؟

ރައީސް ޔާމީން ވިދާޅުވީ މި ހުރިހާ ޒުވާނުންނަށް ވަޒީފާ. އިތުރު ވަޒީފާ އުފައްދަން އިތުރު ރިސޯޓުތައް ބާޒާރަށް ނެރެން ޖެހިފައިވަނިކޮށް ސަރުކާރުން ޓޫރިޒަމް ސިނާއަތުގެ ވިޔަފާރިތަކަށް ޖެއްސުން ކޮށްގެން ނުވާނެ ކަމަށެވެ.

ވިޔަފާރިވެރިންނަށް އެހާ އަގު ތަފާތުކޮށް ޑޮލަރު މާރު ނުކުރެވޭނެކަން ރައީސް ޔާމީން ވަނީ ފާހަގަކުރައްވާފަ އެވެ. ރައީސް ޔާމީން އިތުރަށް ވިދާޅުވީ، ގްރީން ޓެކްސްތަކަށް ދަންދެން ރިސޯޓުތަކުން ދައުލަތަށް ދައްކަން ޖެހޭ ހުރިހާ ފައިސާއެއް ދައްކަނީ ޑޮލަރުން ކަމަށެވެ.

ވިޔަފާރިތަކުން ލިބޭ ފައިދާއިން ބޮޑު ޚަރަދެއް ވިޔަފާރިވެރިން އިންވެސްޓުމަންޓަކަށް ކުރަން ޖެހޭ ކަމަށާއި އިންވެސްޓުމަންޓުތަކަށް ލޯނު ފައިސާ ނަގާފައި ހުރީ ދިވެހި ރުފިޔާއިން ނޫން ކަމަށް ރައީސް ޔާމީން ވިދާޅުވި އެވެ. އެހެންކަމުން އެ ލޯނު ދެއްކުމަށް ވެސް ވިޔަފާރިވެރިން ޑޮލަރު ބޭނުންވާކަން ރައީސް ޔާމީން ފަހަގަކުރެއްވި އެވެ.

މިދިޔަ ދިހަ ވަރަކަށް އަހަރު ހަދާފައި ހުރި ރިސޯޓުތަކުން ނަގާފައި ހުރި ލޯނުތަކަށް އަދިވެސް ފައިސާ ދައްކަމުން އަންނަ ކަަން ފާހަގަކުރައްވައި، ރައީސް ޔާމީން ވިދާޅުވީ މި ގަވާއިދުގެ ސަބަބުން ވިޔަފާރިވެރިންނަށް ބުރަ ބޮޑުވާ ކަމަށެވެ.

ޑޮލަރުގެ ތާށިކަން ހައްލު ކުރަން ކަމަށް ބުނެ އެމްއެމްއޭ އިން ވަރަށް ކުއްލި ގޮތަކަށް ކަމާ ބެހޭ ފަރާތްތަކުގެ މަޝްވަރާއެއް ނެތި ގަވައިދަށް މި ގެނައި ބަދަލަށް ރިސޯޓުތަކުން ދެކޮޅު ހަދަމުން ދިއުމާއެކު މި އާ ގަވާއިދު ބޭކާރު އެއްޗަކަށް ވެދާނެ ކަމުގެ ބިރު އުފެދި ސަރުކާރުން ރިސޯޓް އޯނަރުން އަތުން "ޖަހައިގަންނަން އުޅުނު ޑޮލަރު" ސަރުކާރަށް ލިބޭނެ ކަމުގެ ފެހި ސިގްނަލް މިހާރު ވަނީ ގެއްލި ފައިއެވެ.