އެންމެ ބޮޑު ކަންބޮޑުވުމަކީ ސަރުކާރުން ގެންނަން އުޅޭ އިގްތިސޯދީ ރިފޯމުގެ އެއްވެސް ތަފުސީލެއް ނޭނގުން ކަމަށް ކުރީގެ ފިނޭންސް މިނިސްޓަރު އިބްރާހީމް އަމީރު ރޭ ވިދާޅުވެއްޖެއެވެ.

ދުނިޔޭގެ އެންމެ މަޝްހޫރު ކްރެޑިޓް އޭޖެންސީތަކުގެ ތެރެއިން އެއް އޭޖެންސީ ކަމަށްވާ ފިޗް އިން ރާއްޖެ "ސީސީ" ރޭޓިން އަކަށް ދަށްކޮށްފައެވެ.

ރާއްޖެއަށް ކުރިން ދީފައިވަނީ "ސީސީސީ ޕްލަސް" އެވެ. އޭގެ ކުރިން ރާއްޖެއަށް ދީފައި އޮތީ "ސީސީސީ" ރޭޓިން އެކެވެ. މިއީ މި އަހަރު ރޭޓިން ދަށްކުރި ދެވަނަ ފަހަރެވެ.

މިދިޔަ ޖޫން މަހު ނެރުނު ފިޗް ރޭޓިންގައި ދައުލަތުގެ ދަރަނީގެ ހާލަރު ރަނގަޅުކޮށް އިސްލާހީ ފިޔަވަޅުތައް އަވަސް ކުރުމަށް ގޮވާލާފައި ވެ އެވެ. އިސްލާހީ ފިޔަވަޅުތައް ސަރުކާރުން އިއުލާން ކޮށްފައިވީ ނަމަވެސް އަދި އަމަލީ ގޮތުން އެއްވެސް މަސައްކަތެއް ނުކުރެއެވެ.

ރޭޓިން އޭޖެންސީތަކާއި ބައިނަލްއަގުވާމީ މާލީ އިދާރާތަކުން ޒަމާނުއްސުރެ ލަފާދެމުން އައިސްފައިވާ އިސްލާހީ ފިޔަވަޅުތައް އެޅުމަށް މި ސަރުކާރުން އަންނަނީ ތައްޔާރުވަމުންނެވެ.

ނަމަވެސް އަމީރު ވަނީ ހަރަދު ކުޑަކުރުމަށް ޓަކައި މުއިއްޒު ސަރުކާރުން ގެންގުޅޭ މާލީ ސިޔާސަތަށް ވަރަށް ބޮޑަށް ފާޑުވިދާޅުވެފައެވެ.

އަންނަ އަހަރަށް ލަފާކޮށް ހުށަހަޅާފައިވާ ބަޖެޓުގައި ސަރުކާރުގެ އިސްރާފާއި ޚަރަދުތައް ކުޑަކުރަން މަސައްކަތްކޮށްފައިވާ ތަން އެއްވެސް ވަރަކަށް ފެންނަން ނެތް ކަމަށް އަމީރު ވިދާޅުވިއެވެ. އޭގެ ބަދަލުގައި ސީދާ ރައްޔިތުންނާ ގުޅިފައިހުރި އާސަންދައާއި، ސަބްސިޑީއާއި ބާސިކް ޕެންޝަނުން ތިން ބިލިއަން ރުފިޔާ އުނިކޮށްފައިވާ ކަމަށާއި، ރިފޯމް ގެންނަން މި އުޅެނީ ހަމަ އެކަނި މި ކަންކަމުން ކަމަށް އަމީރު ވިދާޅުވިއެވެ.

އިތުރަށް ވާހަކަަދައްކަވަމުން އަމީރު ވިދާޅުވި މި ސަރުކާރަށް ދެމެހެއްޓެނެވި ގޮތެއްގައި ކުރެވެނީ އެންމެ ކަމެއް ކަމަށެވެ. އެއީ ދޮގުހެދުމާއި މަކަރު ހެދުމާއި އޮޅުވާލުން ކަމަށެވެ. އެގޮތުން ދައުލަތުގެ މީޑިއާގައި ވާހަކަދައްކަވަމުން އިކޮނޮމިކް މިނިސްޓަރ ސައީދު ދާދި ފަހުން އިތުރުފުޅު ހައްދަވާފައިވާ ކަމަށް އަމީރު ވިދާޅުވިއެވެ.

ފިނޭންސް މިނިސްޓްރީން ބުނަީ އާމްދަނީ އިތުރު ކުރުމަށް އަޅާ ފިޔަވަޅުތަކުގެ އިތުރުން ހަރަދުތައް ކުޑަ ކުރުމަށްޓަކައި އެސްއޯއީތަކުގެ ހަރަދުތައް ކުޑަކުރުމާއި ޓާގެޓު ސަބްސިޑީއަށް ބަދަލުކުރުމަށް ވެސް ނިންމާފައިވާ ކަމަށެވެ. އޭގެ އިތުރުން ބަލްކް ޕްރޮކިއުމަންޓް ނިޒާމު މެދުވެރިކޮށް ފެންވަރު ރަނގަޅު ބޭސް ރާއްޖެއަށް އެތެރެ ކުރަން ފަށާފައިވާ ކަމަށް އެ މިނިސްޓްރީން ބުންޏެވެ.

ނަމަވެސް މިއިން އެއްވެސް ކަމެއް ތަފްފީޒުވަމުން އަންނަތަނެއް ނުފެނެ އެވެ. ދަރިނި އިތުރުވެ ސިޔާސީ މަގާމު އިތުރުކޮށް އިސްރާފް ހަރަދު ކުރުން ނޫން ކަމެއް ސަރުކާރުން ކުރާތަނެއް ނުފެނެ އެވެ.